Lyngba ki kynhun SHG yn lah ban kyntiew shuh shuh ia ka roi ka par ha ka jylla baroh kawei, ong u DC East Jaintia Hills

Syllad | The Rising MeghalayaSeptember 24, 2023

Ka jingdon jong ki kynhun Self Help Group (SHG) kan lah ban kyntiew shuh shuh ia ka ioh ka kot bad ka roi ka par ha ka jylla hi baroh kawei, kata da kaba phaikhmat kyrpang ruh ha kaba iadei ka jingpynkup bor ia ki kynthei ha kane ka bynta, ong u Deputy Commissiner ka East Jaintia Hills District, u Abhalash Baranwal haba aijingkren ha ka jingrakhe dap shi snem jong ka San Shnong Cluster Level Federation Multi-purpose Co-operative Society (SSCLFMCS) ha ka jingialang kaba la long haka 22 tarik Nailur ha Dong Pyrdi Community Hall, Mukhaialong, East Jaintia Hills District.

Ha kane ka jingrakhe jong ka San Shnong Cluster Level Federation Multi-purpose Co-operative Society la ia don lang ruh u Block Development Officer, Wapung C&RD Block, u Bah T. Shylla, Chief Operating Officer, Meghalaya State Rural Livelihoods Society (MSRLS), Bah R. Kynta, President, Raij Tuber, Ma Harvis Phawa, District Mission Manager, Ma K. Slong nalor kiwei pat ki ophisar na ki tnat bapher bapher, ki heh na ki bank, ki nongialam shnong, ki dkhot ki kynhun seng treimon sngewbha, ki dkhot ki SHG bad ki nongshong shnong jong ka thain.

Na ka liang u DC u la ong ruh ba ka jingphaikhmat jong ka sorkar jylla ka long ban pynkup bor ia ki SHG khamtam ha ki thain nongkyndong, kata da kaba pyrto ruh ia ki jingtreikam jong ka San Shnong Cluster Level Federation Multi-purpose Co-operative Society namar ka jingiatreikam bad ki tnat sorkar bapher bapher da kaba pynthikna ruh ha kane ka jingialang hapdeng ki dkhot ki SHG kiba hap hapoh ka San Shnong CLF ba na ka liang ki bor pyniaid district kin plie ia ki lad jingiarap katba lah khnang ban pynurlong ia ki jingphohsniew katkum ki jingthmu ba la thaw ia ki SHG hapoh kane ka jylla Meghalaya. Nalor kata u Baranwal u la kren ruh halor ka jingdonkam ban wanrah ia ki jaka aijinghikai na ka bynta ki SHG khnang ban lah ban kyntiew shuh shuh ia ka rukom treikam ka jong ki.

Na ka liang u ophisar ka Meghalaya State Rural Livelihood Society (MSRLS), u Bah R. Kynta ula pynshai halor ka jingmih jong ki kynhun SHG ha ka jylla bad halor ki jingjop ha ka jingtreikam ki jong ki ban wanrah ka jingkylla hapoh ka imlang sahlang baroh kawei.U la pyntip ruh ha ka jingialang halor ka jingsdang kaba rit naduh ba la pyntreikam ia ka NRLM ha Meghalaya ha u snem 2014, kata hadien ba ki kynhun SHG ki la kiew rasong ha ka jylla ha kaba haduh mynta ki la don haduh kumba 45,000 tylli ki SHG, 5500 ki VO bad 87 tylli ki CLF ha ka jylla Meghalaya hi baroh kawei.

Ha kawei pat ka bynta na ka liang u President ka Seinraij Tuber, u Ma Harvis Phawa ha ka jingkren u la pynpaw ba ka jingmih jong ki kynhun SHG ka la iarap shibun ha ka liang ka ioh kam ioh jam hapoh ki shnong ki thaw bad ka la plielad ruh na ka bynta ki kynthei ba kin iashim bynta ha ki prokram kiba iadei bad ka bha ka miat bad ki jingtreikam hapoh ki shnong ki thaw.

Ha kane ka sngi ka la don ruh ka jingsam khusnam sha ki VO bad ki SHG kiba lah ban treikam bha hapoh ka CLF, ha kaba ka  Iakyntulang VO ka la ioh pdiang ia ka khusnam Best VO halor ka jinglah ban pyniasoh kaba 100 percent ha ki jingtreikam bad ki bank, katba ka Nangkiewshaphrang VO ka la ioh pdiang kum ka Best VO halor ki sienjam ban kyntiew halor ka koit ka khiah jong ki longkmie bad ki khynnah katba ka Iaidchaphrang SHG ka la ioh pdiang ia ka khusnam kum ka Best SHG halor ka jinglah ban pynbiang ia ki jingthoh jingtar kiba iadei bad ki kam pisa pilain.

Lah ban kdew ba ia ka San Shnong Cluster Level Federation la seng ha ka 22 tarik u Nohprah 2021 ha kaba mynta ka don 8 tylli ki VO hapoh jong ka, 16 tylli ki SHG bad ka jingdon jong baroh ki dkhot ka long haduh 1509 ngut.

Kiwei pat kiba la aijingkren ha kane ka jingialang ki kynthup ia ka President, San Shnong CLF, ka Kong B. Dkhar, Secretary, San Shnong CLF, Kong  Nadona Dkhar, bad Vice-President, San Shnong CLF, ka Kong I. Phawa.