Lyngba u AI bad QR code yn pynshisha ia ki jain Ryndia tynrai ba la pynmih na Meghalaya

Syllad | The Rising MeghalayaOctober 14, 2023

Hadien ka jingseisoh ha ka jingpynpaw paidbah ia ki jain Ryndia ba la pynmih da ka jylla Meghalaya ha ka ‘G20 International Crafts Bazaar,’kaba dang shen, na ka liang ka Tnat Textile ka sorkar jylla ha ryngkat ka jingiatreilang bad ka NEHHDC (North East Handloom & Handicraft Development Corporation), ki la pyllait ia ka pilot project na ka bynta ban pynkylla digital ia ki jain bad ki mar thain kti Ryndia ba la pynmih ne “Digitalization of Handloom” ha ka jingialang kaba la long ha Umden – Diwon ha ka sngi Thohdieng ba la lah.

Ha kane ka jingialang ba la pynlong hapoh Duya Hall ha Umden -Diwon  la ia don lang ruh u Bah FR Kharkongor, IAS, Commissioner & Secretary, Textiles, u RK Singh, M.D. ka  NEHHDC ki nongmihkhmat na ki jaka pynmih ia kine ki jain Ryndia ba pawkhmat kum na Umden-Diwan ba la tip kum ka Eri Silk Village bad na kiwei pat ki bynta jong ka thain Ri Bhoi kum ka Weaver Associations, Voluntary Organizations (VO), ki ophisar na ka tnat, ki nongialam shnong bad ka kynhun na ka NEHHDC.

Haba kren ha ka jingialang kum u Kongsan u Bah FR Kharkongor u la pynpaw halor ka jingdonkam kyrkieh ban pyntreikam da ka juk jingstad ha kaba iadei bad ki jain ne ki mar Ryndia ba la shna bad thain kti.U la ong ruh ba u la ioh jingtip ba dang shen ki la ioh khubor na Delhi halor ki nongsengkam lajong kiba la lehthok ban pyniaid iew ia kiba kum kine ki jain Ryndia ki bym dei kiba shna bad thain kti bad ki bym dei ruh ki jain Ryndia tynrai na Meghalaya bad die ha ka dor kaba naduh T.19,500 haduh T.24,000 da kaba kam ba ki dei ki jain ba pawnam kiba dei tynrai na Meghalaya ba kiba la shna khlem kano kano ka jingkhleh dawai.

U la kdew ba da ka jingwanrah ia ka Artificial Intelligence (AI)-  technology bad QR Code mynta ban lah ban suh ha kine ki jain ki ban aijingtip ban pynshisha halor ka tynrai jong kine ki jain Ryndia bad mar ba la pynmih na ka jylla bad khamtam napoh katei ka shnong Eri Silk Village.U la pdiang sngewbha ruh ia ka jingiatreilang jong ka NEHHDC kum ka kynhun synrop ha ka jingstad technology ban pyniaid shakhmat ia kane ka project lyngba ka Internet of Things (IoT) devices ha ki jain bad ki mar thain kti jong ki trai shnong lyngba ka jingbuh da u QR Code ka ban pynlong ia ki nongthied nongpeit ba kin ym artatien ha kaba iadei bad ki jain ne kiwei pat ki mar ba la pynmih tynrai na kane ka jylla.

Na ka liang u RK Singh, M.D. NEHHDC ruh ha ka jingkren u la pdiang sngewbha halor ka jingthmu ban pyndonkam ia kane ka technolgy ryngkat ka jingiatreilang bad ka Tnat Textile bad kdew ruh halor ka thong ka jong ki ka ban kdup haduh palat 10,000 tylli ki mar Ryndia hapoh ka thain.U la pynshai ruh haba ki nongthied ki scan ia u QR Code, kin ioh jingtip halor ka tynrai jong ka mar, ki jait ksai ba la pyndonkam bad sakhi ruh khyndiat ia ka videi kaba pyni kumno ka thain ia kine ki jain ne ki mar.

U MD u la kdew ruh ba na ka liang u Myntri Rangbahduh Narendra Modi dang shen u la iamir jingmut bad ki nongshna bad thain jain Ryndia na kane ka jylla Meghalaya ha ka iew kyrpang ka NEvolution bad pyrto ruh ia ka sap ba kyrpang bad kaba la wanrah jingmyntoi shibun ia ki nongshong shnong kiba don bynta ha kane ka jait kam.

Kiwei pat ki nongkren ha kane ka prokram ki kynthup ruh ia u Bah P Tmung, President ka Ryndia Growers Association, I Rymbai nongtrei kam lajong na Eri village kaba la ioh jingmyntoi lyngba kane ka kam, Iba Mallai, Proprietor ka KINIHO kaba dei ka jaka pynmih ia kine ki mar shna bad thain kti na kane ka shnong.

Shwa kane ka prokram ka kynhun ka la pynlong ka jingleit jurip ia ka DIRC (Design Innovation Resource Centre) ba la wanrah da ka Tnat  Textiles hapoh Eri Silk Village kaba pyni ia ki jain Ryndia bapher bapher bad kaba ai ruh ka jingpynshai sha ki nongwan jngoh bad ki nongwad bniah halor kane ka bynta.