La rakhe iaka lyngkhuh sngi iap ba 187 U Tirot Sing Syiem ha Nongkhlaw

Syllad | The Rising MeghalayaJuly 16, 2022

Ka Tirot Sing Syiemlieh Death Anniversary Committee, Hima Nongkhlaw ha ryngkat ka jingiatreilang jong ka Centre for Historical Research, Synod College, Shillong bad ka tnad Arts and Culture jong ka  sorkar jylla kala rakhe iaka lyngkhuh sngi iap ba 187 snem u Tirot Sing Syiem ha madan Nongrah, Nongkhlaw, Eastern West Khasi Hills District haka sngi Saitjain.

Ka lyngkhuh sngi iap U Tirot Sing Syiem ka dei lashai ka sngi 17 Naitung, hynrei namar ba hap Sngi U Blei, ka committee kala rakhe ia ka mynta ka sngi. U Tirot Sing u dei u khlawait uba u pynbna iaka thma pyrshah iaka sorkar phareng (British) kaba la thmu ban knieh jubor iaka Rilum Khasi. Haka jingialeh jong U Tirot Sing Syiem bad ka sorkar phareng kaba thmu ban pyniasoh iaka Guwahati bad iaka rithor Sylhet, Bangladesh lyngba ka hima Khatsaw Phra haka snem 1827. U Tirot Sing ula shah kem noh ha ka sorkar hadien ka jingialeh kaba la neh bun snem ha ka 13 tarik Kyllalyngkot 1933 bad la rah sha Dhaka ban set byndi. Hadien ba U Tirot Sing um shym la pyndem la set byndi ia u haduh ka sngi jong ka jingkhlad jong u katta ha ka 17 Naitung 1835.

U Kongsan ha kane prokram u dei u MP Rajya Sabha Dr. WR Kharlukhi bad la iadonlang ruh ka Prof. Amena N Passah i nonghikai haka History jong ka skulbah NEHU, Additional Deputy Commissioner Eastern West Khasi Hills District, u Bah V. Swer, Deputy Superintendent of Police (Headquarters) ka Eastern West Khasi Hills District, u Bah H. Kharkongor, U Syiem Khynnah ka Hima Nongkhlaw, u Bah KM Syiemlieh, Principal Synod College, Shillong, Dr. RM Lyngdoh, ki dkhot ka Kur Syiemlieh, ki nongialam shnong, ki nonghikai, ki khynnah pule bad ki paidbah ka dong ka thain.

U Dr. WR Kharlukhi, haba kren kum u kongsan ula ong ba kum shibynta jong ka jingrakhe ia ka Azadi ka Amrit Mahotsav ne ka jingrakhe jong ka jingdap 75 snem ka jingioh laitluid ka Ri India, ka Sorkar Pdeng ka la buh ia thup jong ki 115 ngut ki riew ialeh laitluid ka Ri India ha kaba la kynthup ruh ia ka kyrteng jong u riewkhraw ialeh laitluid ka Ri Khasi, U Tirot Sing Syiem nalor kiwei pat ki riewialeh laitluid na kiwei pat ki jylla ka Ri India.

Haba kren halor u synniang u bynhei bala noh U Tirot Sing Syiem, u Dr. Kharlukhi u la ong ba watla une u riewshlur u la khlad noh 187 snem mynshwa, hynrei ka kyrteng bad ka nam jong u ka dang iai im bad iaisah haduh kine ki sngi kiba mynta bad ia ka jingshlur jong u la rakhe bad kynmaw burom haduh kine ki sngi ym tang ha shnong Nongkhlaw hynrei ha baroh kawei ka jylla Meghalaya.

U Dr. Kharlukhi u la ban ruh halor ka jinglenlade jong U Tirot Sing Syiem na ka bynta ka bit ka biang jong ki pateng kiban wan bad u la khot la wer ruh ia ki paidbah kiba la iadon ha kane ka sngi ban ring jingmut na ka mynsiem iakhun jong u Tirot Sing Syiem ha ka jingim jongki kaba man ka sngi.

Ka Prof. Amena N Passah kala iathuh shaphang ka jingiaid lynti jong U Syiem Tirot Sing kum u riewialeh laitluid ka Ri haduh ka sngi ba un da khlad noh na ka sla pyrthei ha ka 17 tarik u Naitung jong ka snem 1835.

Ka Tirot Sing Syiemlieh Death Anniversary Committee, Hima Nongkhlaw kala ai iaka dorkhat ha u kongsan ban kyrpad ia u ban buh ia u motdur ba shirynieng jong u Tirot Sing Syiem ha Nongkhlaw bad ban shna ruh ia ka Children’s Park kum shibynta ban pynsah nam ia une u riewkhraw ka jylla.

La pynphuh pynphieng ia kane ka sngi da ki jingrwai bad jingshad tynrai na ki riew donsap kiba kynthup ia ki khynnah pule bad ki khun samla ka thain.

Shuwa ka prokram ha madan Nongrah, u kongsan bad ki kynrem ki lyndan ki la ioh ban leit ban buh syntiew ha u motdur jong u Tirot Sing Syiem uba don ha Khasi Patriotic Home, Nongkhlaw.