Lyniar ki nongrep ba wan pom pathar briew ka KHADC ia ki jingthung jingtep ha Umladoh, Ri Bhoi

Syllad | The Rising MeghalayaAugust 5, 2024

Ki paid nongrep khamtam ki longkmie jong ka shnong Umladoh, kaba hap hapoh ka Nongpoh Civil Sub Division, Ri Bhoi District ki la don hapdeng ka jingsngewsih kthang hadien ba ki jingthung jingtep ki jong ki, ki la shah jynrat bad mait naphang ha ki briew jong ka Khasi Hills Autonomous District Council (KHADC) Lailad Beat ha ka 3 tarik mynta u bnai.

Halor kane ka jingjia ka la mih ka jingkynnoh ba kane ka jingleh donbor jong ka tnad ka Council Lailad beat ka dei kaba khlem da pyntip sha ki nongialam shnong ne wat ia ki nongshong shnong, ha kaba ki la shu leit bad pom naphang ia ki jingthung jingtep kaba kynthup naduh ki tynrai dieng kait, tynrai diengkwai, sohtrun, sohniamtra bad kiwei kiwei ki jingthung jingtep kaba la ktah jur ia ki nongshong shnong khamtam ia ki santylli ki longiing jong ki longkmie kiba ju bsa ia la ka iing ka sem da kaba rep ba riang.

Kine ki santylli ki longiing ba la mad ia kane ka jingshah thombor ki kynthup ia ka Kong Prin Umsong, ka Kong Brina Sylliang, Kong Slis Lyngdoh, Kong Ormilis Lapang bad ka Kong Phiarnes Sylliang kiba la mad ym tang ia ka jingduhnong kaba khraw hynrei ka jingiam rem halor kane ka jingshah leh donbor.

Haba iakren bad ki lad pathai khubor kine ki longkmie ki la pynpaw ka jingsngewsih kthang bad pangnud kaba khraw halor kane ka jingshem pap kaba khlem poi pyrkhat ban iohi ba ki jingthung jingtep ba ki la rep shitom la bun bun snem ki la shu shah pom bad shah pynjulor syndet syndet khlem ka jingtip ka jong ki.

Na ka liang u Bah Wet Syngkli, Rangbah Shnong ka Umladoh, u la ong ba kane ka jingleh jong kane ka Council ka la pynduhnong bad ktah mationg ia ki nongshong shnong khamtam ia kito ki longiing kiba im bad bsa khun da kaba shu rep shu riang bad kiba   kamai mynsngi bad bam mynmiet.

“Na ka liang ka Dorbar Shnong Umladoh ka pynrem jur ia kane ka jingleh donbor bad riewkhlaw da ki briew ba bat ia ka aiñ bad kaba long  kum ka jingiuh roit ia ki longiing baduk khamtam ki nongrep jong ka shnong ka thaw, bad ngi dawa na ki bor ba dei peit ban bishar ia kane ka jingwan leh donbor jong ka tnad District Council bad ban ai ia rai kaba hok na ka bynta kine ki longiing kiba mad ia kane ka apot”, ong u Bah Syngkli

Ha kajuh ka por u la iathuh ruh ba ki ophisar ka tnad Forest ha ka 1 tarik u Nailar ki la shu wan mih ban ong ia ki nongshong shnong ban weng ia ki jingthung jingtep na ki jaka ba hap hapoh u pud u sam jong kane ka tnad, hynrei khlem da ai por eiei bad tang hapoh shisngi ki la shu wan leh donbor da kaba pyndonkam da ki tiar mashin ban pom bad pynjulor naphang ia ki mar rep jong ki nongshong Shnong.