Mab ka MeECL haduh T.26 klur ka kuna kiba shah ot bording hapoh ka OTS Scheme

Syllad | The Rising MeghalayaMarch 4, 2025

U Myntri Rangbah ka Jylla u Conrad K Sangma haka 4 tarik Lber u la pyllait ia ka One Time Settlement (OTS) Scheme na ka bynta ki nongpyndonkam bording ka MeECL ha ryngkat ka jingiadon lang u Myntri ka Tnad bording u Abu Taher Mondal.

Haba pyllait ia kane ka skhim u CM u la ong ba haduh jan 45,000 ki nongpyndonkam bording kin ioh jingmyntoi bad palat T.26 klur na ki jingshim tam bad ka kuna yn sa mab ei noh. “Ki nongpyndonkam bording kin hap ban siew tang ia ka trai kaba 40% bad ia ka 60% kaba sah kin siew ha ki san instalment khlem ka sut,” u la ong.

U la kyntu ruh ia ki nongpyndonkam bording ba kin shim ia ka kabu lyngba kane ka skhim bad ban ioh ia ki jingmyntoi ba la ai da ka sorkar. U la ong ba kane ka sienjam ka dei kaba la shim da ka sorkar ban pynduna ia ka jingkit ba khia jong ki nongpyndonkam bording ki bym pat shym la lah ban siew ia ka bai bording.

Ka OTS Scheme 2025 ka treikam tang na ka bynta kito kiba pyndonkam ia ki  “Domestic Low Tension (DLT)” bad “Kutir Jyoti/ BPL” kiba la dep ban pynbna ba ka bording kaba ki pyndonkam kal ong tang hapoh ka 5 KW na ka bynta kito ki longiing kiba la shah ot ka lain bording namar ka jingbym siew ia ka bai bording khnang ban ioh noh ia ka bai bording kaba la sahteng.

Kane ka OTS Scheme 2025 kan sdang treikam naduh ka 1 tarik Lber 2025 haduh ka 31 tari Lber 2025.Kiba lah ban aplai bad ioh jingmyntoi lyngba kane ka skhim kin dei tang kito ki longiing kiba la shah ot ka lain bording.

Baroh ka bai bording ka bym pat siew da ki nongpyndonkam bording ka la kot sha ka T.119 klur.