Mad jingeh ki paidbah ba sangeh ka jingtrei iaka surok Kudengrim sha Kudeng Thymmai

Syllad | The Rising MeghalayaJuly 1, 2024

Ka jingsuki u kontraktor ban trei iaka surok na ka shnong Kudengrim sha Kudengthymmai kiba hapoh ka Amlarem Sub-Division, West Jaintia Hills kala buh jingeh shibun ia kitei shnong bad kiwei pat ki shnong ba marjan ha ka leit ka wan khamtam haba jia ka pang ka shitom.

Na kaliang Synjuk ki Waheh Shnong War Jaiñtia ha ka jingialam jong u ma Kolmen Poshna ki la iakynduh ia ki nongshong shnong ka Kudengrim bad Kudeng Thymmai kumjuh ruh ia ki Waheh Shnong jong ki shnong ba marjan ka thain ki kynthup ia u Waheh Shnong ka Kudengrim u ma M Pohtam, u Waheh Shnong Mawlong ma Moonlight Lamat, u secretary shnong Khonglah ma Angelus Sumer, Waheh Shnong Sohkha Shnong PS Suchen, Waheh Shnong Lamin ma Golden Gashnga, Waheh Shnong Kudeng Thymmai ma Barister Paswet ryngkat ki nongshnong shnong na ka bynta ban iamir jingmut lang.

Ha kane ka jingiakynduh baroh kine ki nongialam shnong kila pynpaw iaka jingbynñiaw halor ka jingsuki u kontraktor Bah K Pakma ban pyntrei ia kane ka surok. Kila iathuh ba une u kontraktor ula ioh iaka workorder mynta la jan dap ar snem, hynrei ka jingpyntrei ia kane ka surok kaba tang 5.2 KM na Kudengrim sha Kudengthymmai kaba la mang haduh 17 Klur tam ka dang sahteng haduh mynta.

Ki la pynpaw ruh ba kane ka surok ka long kaba kongsan haduh katta katta namar lada la lah ban pyndep ia ka kan shim por tang kumba 10 ne 15 minint ia ki nongshong shnong ka Kudengrim bad kiwei de ki shnong ba marjan kane ka thain ban poi sha ki jaka ai jingsumar, jaka pule, jaka khaïi pateng kum sha Dawki bad kiwei kiwei de ka ban pynduna ia ka por bad ka jinglut jingsep khamtam ha ka pang ka shitom.

Nalor kata ki nongshong shnong ka Kudengrim ki la pynpaw ruh ka jingeh namar ba hashwa ban rung sha ka shnong ka surok kaba ha ka jingjngai kaba kumba 500 metre ka la sniew bad julor lut namar utei u kontraktor u tang shu dep ot khyndew ban pynheh iaka surok ula ieh noh khlem trei shuh iaka surok haduh mynta.

Kumta na ka liang ki Waheh Shnong ryngkat ki paidbah ki pynrem jur ia une u kontraktor bad dawa ba u dei ban sdang biang ka jingpyntrei lane u dei ban aiti noh ia kane ka kam khnang ba ka sorkar kan khot tender da kawei pat bad khnang ba kiwei ki kontraktor kin lah ban pyndep noh kloi ia kane ka kam.