Mad jingeh u paidbah ba shong ha khappud Bangladesh bym don dawai dashin ka sub centre ong ka KSU

Syllad | The Rising MeghalayaAugust 27, 2023

Ka Khasi Students’ Union (KSU) Huroi Unit hadien ba ka la pynlong ka jingleit jurip ia ka jaka aijingsumar Sub Centre hapoh ka shnong Huroi, East Jaintia Hills District, kata ka shnong kaba don ha ka thain khappud bad ka ri Bangladesh ka la lap ia shibun bah ki jingduna bad kaba la ktah jur shisha ia ki paidbah jong ka thain hi baroh kawei.

Ha kane ka jingleit jurip ka KSU ka la ioh ruh ia ka lad ban iakren bad ka nongtrei jong kane ka jaka sumar kaba la pynpaw ba ki don shibun bah ki jinduna hapoh kan ka jaka sumar bad wat ka um kaba dei ka jingdonkam kaba kongsan kam don satia hapoh kane ka sub centre.

Ki jingduna kiba kongsan kiba ka KSU ka la lap da la ki jong ki khmat hapoh kane ka jaka sumar ki kynthup ruh ia ka bording ilektrik namar kane ka jaka sumar kam pat don wat ia ka bording. Nalor kata la shem ruh ba kam don satia ia ki jaka thiah ban pynkha khunlung.

Na ka liang ka KSU ka pynpaw ka jingsngewkhia kaba jur hadien ba ka la sakhi da la ki jong ki khmat halor kine ki jingduna hapoh kane ka jaka aijingsumar bad halor ka jingshah iehnoh bein jong ki paidbah nongshong shnong jong kane ka thain khappud, kata khamtam ha kaba iadei bad ki longkmie kiba armet kumjuh ia ki paidbah kiba pang ba shitom bad kiba donkam ia ki lad jingsumar.

Ka KSU ka la ong ba kaba pynlyngngoh shuh shuh ia ka seng ka long ba ha kane ka sub-centre wat ki dawai dashin na bynta u paidbah ban pyndonkam haba pang ba shitom ym ju don haba ki leit ban shim dawai ne shah sumar hapoh kane ka centre.

Kumta na ka liang ka KSU ka dawa jur na ki bor district kumjuh ruh na ka MLA ka 5-Sutnga Saipung constituency ka kong Santa Mary Shylla bad khamtam eh ia ka sorkar jylla ba ki dei ban shimkhia halor kane ka jingeh u paitbah ka thain, kata khamtam ha kum kane ka por lyiur ha kaba ki paidbah ba pang ba shitom ki sngew kutlad namar ka jingbym don ki kali kiban leit iew leit hat namar ka jingsniew palat ka lynti surok na Huroi shaduh Sunapur.

Shuh shuh na ka liang ka KSU lyngba une u kyrwoh ka buh ruh ka jingkylli halor ka jingshah ieh bein jong ki paidbah ha ki thain khappud bad ka Bangladesh ha ki bor sorkar ka jylla.