Maham bad dawa ka HNLC ia u CEM ka KHADC ban pyndam ban ithuh ia ka Majai kum ka Raid

Syllad | The Rising MeghalayaJuly 4, 2024

Ka Seng Hynniewtrep National Liberation Council (HNLC) ka la maham ia u Chief Executive Member (CEM) ka Khasi Hills Autonomous District Council (KHADC) bad dawa ba u dei ban pyndam noh mardor ia ka jingpynbna ba dang shen ban ai jingithuh ia ka Majai kum ka Raid.

Ha u kyrwoh lyngba u General Secretary cum Publicity Secretary ka HNLC, u  Bah Sainkupar Nongtraw u la ong, “Ka Sorkar NPP hapoh ka Jylla bad KHADC ka la pynlong ia ki nongshong shnong ka thain Sohra ba kin iakynduh jingeh namar ka jingthngan bad pynkylla khongpong ia ka jingim ka jong ki. Ha ka jaka ban kyntiew kyrdan ia ka Sohra sha ka District, ka la khangdam pynban ia ka MCCL bad pyrshang ban pynlong ia ki briew jong ngi ba kin kylla khlem kam khlem jam bad kum ki nongshong shnong ki bym don jingmut.”

“Ka Seng HNLC ka maham ia u CEM ba u dei ban pyndam noh mardor ia katei ka jingpynbna ba dang shen ban ai jingithuh ia ka Majai kum ka Raid lem kumta. Ka Majai ka dei kaba pyniaid da ki heh saipan kiba dei ki bar Jylla bad ki ‘Ingkhong shyllangmat’,” u la ong da kaba bynrap ba ka jingpynmih ia kane ka jingpynbna ka la pynkmen shibun ia ki bar jylla kiba shong ba sah ha ka Majai, kiba la ialehkmen ruh da kaba thang bom pataka bad iashad ia kmen.

Nalor kata u la ong ruh, “Ki nongshong shnong jong ka Bri u Hynniewtrep ki la thait la kdang ia ka jingshukor jong ki riew sain pyrthei bad ia ki kam thok kam shukor jong ka sorkar. Ki samla ki angnud ban kyrshan hi da lade ia lade bad ban weng ia la ki jong ki jingeh, hynrei na ka liang ka sorkar ba la ialam da ka NPP ka la knieh noh ia ki kam jong ki naduh kiba rit ba ria da kaba iarap pynban ban kyntiew ia ka ioh ka kot bad aibor ia ki bar jylla.”

Shuh shuh u Bah Sainkupar u la ong ruh, “Ka jingkhang ia ka karkhana dewbilat bad ka jingkhanglad ia ki kam barit ba ria kum ki kam khaii shyiap bad ki par maw ka la ktah jur ia ka kamai kajih. Wat hadien ka jingpyrshang da ka Hima bad u Syiem ban iarap da kaba ailad ba kin khaii ia u mawshun sha Bangladesh, hynrei na ka liang ka KHADC ka kwah ban iuhroit ia kine ki sienjam ban kyrshan ia ki nongkhaii bar jylla.”