Maham bad kyntu ka HNLC ia ki paid Hindu ka Jylla ban pyrshah ia ka jingwan rung ka yatra masi

Syllad | The Rising MeghalayaSeptember 29, 2024

Ka Seng Hynniewtrep National Liberation Council (HNLC) ha ka 29 tarik Nailur ka la maham da kaba kyntu ruh ia ki paid Hindu ha Meghalaya ba ki dei ban pyrshah ia ka jingwan rung ka “Yatra Masi” ne ka jingpynlong ia ka rally ban ialap khang pyrshah ia ka jingshoh doh bad bam doh masi hapoh ka Jylla.

Ka HNLC ha u kyrwoh lyngba u General Secretary Cum Publicity Secretary u Bah Sainkupar Nongtraw ka la ong, “Ka dei ka kamram jong ki paid Hindu ka Meghalaya ba kin pyrshah ia ka jingwan rung ka ‘Yatra Masi’ ba kan wan rung ha kane ka jylla da ka jingthmu ban pynlong ia ka rally ialap ia kaei kaba long pyrshah ia ki trai trai trai muluk. Ka HNLC bad ki nongshong shnong jong ka kin ym lah ban shah halor kano kano ka jingpyrshang ban wan tuklar halor ka kolshor kaba iadei bad ka rukom bam ka jong ngi.”

U la maham ruh da kaba ong, “Lada kane ka kynhun iada masi ka shlan ban tynjuh ia ki nongshong shnong jong ka thain ka jong ngi, ka HNLC kan khanglad ia ki paid Hindu ka jylla ba kin lehkmen puja tad lada ki la pynsangeh ia kane ka jingpyrshang ka jong ki ban pynkohnguh ia ki nongshong shnong ki jong ngi ba ki mrad ki kham khraw bad kham kordor ban ia ki brew.”

“Kino kino ki kynhun niam kiba dang kham sngewkhia na ka bynta ki mrad ban ia ki briew kim ia pher hi na ki mrad,” ong u Bah Sainkupar.

U la kdew ruh ia kaei kaba la jia hadien ka jingpynbna jong kane ka kynhun iada masi ha kylleng ka Meghalaya: “Ha kiwei ki Jylla, ngi lah ban iohi tang halor ka jingpynher ia ka lama kaba jrong 21 phut, hynrei hangne ha Meghalaya phi la ai ia ka lad ka kabu ba ngin pynher ia ka lama kaba 21,000 phut.”

“Kane ka jingpynpaw kam dei kaei kaei ruh hynrei ka jingleh pynkhihwin kaba tyngjuh bor pyrshah ia ka sorkar Meghalaya bad kaba la pynkhih bitar ia ki trai shnong. Kum kine ki jingkren ki dei kiba thmu ban kynthoh pyrshah ia ka imlang ka sahlang bad nangpynjur shuh shuh ia ka jingkhihwin bad jingpynbitar,” bynrap u bah Sainkupar.

Nalor kata u la ong ba ka jingiatyngkhuh jong kane ka kynhun iada masi ia ki jingpyrshah ban pynlong rally hapoh ka thain Shatei Lammihngi ka pyni ia ka jingpyrshah jur da ki kynhun nongshong shnong, kata da kaba bynrap, “Ka HNLC ka kyntu ia ki ri kum ka America, China, Pakistan bad kiwei pat ba kin tuklar lem ia ka India hashwa ba kan kylla long pynban ka ri ka ban synshar da ki nongialap niam.”

Shuh shuh u la ong ba kane ka jingthmu pynlong rally da kane ka kynhun iada masi ka wanrah ka jingsngewkhia khamtam haba la sakhi ia ka jingnang jur ki jingjia shah pyniap dusmon jong kiba bun ki briew ha ki kynhun kiba kam ia lade ki nongiada masi tang namar ka jingsuba donkti ha ki kam khaii, shoh doh ne bam doh masi.

Haba pynshong nongrim lyngba ka lad pathai khubor Reuters, u Bah Sainkupar u la ong ba ki don haduh 63 tylli ki jingjia shah thombor hapdeng u snem 2010 bad hapdeng jong u snem 2017, kaba la kam ruh sha ka jingshah pyniap jong ki 28 ngut ki briew bad ka jingmynsaw ia 124 ngut kiwei pat. Kine ki jingjia ki la nangkynrei bha khamtam hadien ba u Myntri Rangbahduh ka ri u  Narendra Modi u la shimti ia ka shuki naduh u snem 2014.