Maham ka Dorbar Shnong Lion Mission Compound ia kiba leh pyrshah aiñ shnong

Syllad | The Rising MeghalayaDecember 6, 2021

Ka Dorbar Shnong Lion Mission Compound, Jowai hadien ba kala lap ba bun ki briew ki leh iaki kam khlem akor hapoh u pud u ang ka shnong kiba long pyrshah iaka rukom pyniaid shnong kala pynmih da ka jingpynbna paidbah bad maham ba ym bit ban leh pyrshah iaki adong shnong.

“Bunsien ngi lap ba ki briew ba iaid ba ieng ki kren khlem akor bad kumjuh ki ia pynieng iaki kali motor ha ki jaka badum bad iashongdih kyiad bad kiwei kiwei ki jingdih pynbuiad kaba wanrah ka jingtieng jingsmiej iaki kynthei khynnah kiba iaid ba ieng bad ka wanrah ruh iaka jingsniewdur ka shnong ka thaw,” la ong u ma KF Mukhim waheh shnong.

Ula ong ruh ba naduh ba mih ka khubor lada lap ia kino kino kiba leh pyrshah iaki ain shnong ka shnong kan pynshitom da kaba tyngeh. Kane jingmaham kan treikam ruh naka surok ban mih sha Tpeppale naduh ka lad Loomkyrwiang.

Kine harum kidei ki jingmaham na ka bor shnong Lion Mission:

• Ym bit ban kren sih kren sang, kren khlem akor ne hylla.
• Ym bit ban ieng kai/shongkai ha ki jaka ba kyndong/kynjah (mynsngi/mynmiet)
• Ym bit ban pynieng iaki kali ban shong dih kyiad, dih bhang, dih drug bad kiwei kiwei ki jingdih pynbuaid hapoh kali ne shabar
• Ym bit ban pynieng kali (overnight parking) khlem ioh jingbit.
• Ym bit ban tem pynheh iaki sur jingrwai hapoh kali.
• Ym bit ban bret pathar iaki jaboh jabain kat sha ba lap ba shem.
• Lada lap ia ki ba leh pyrshah yn pynshitom katkum ki ain jong ka shnong.