Maham ka FKJGP ia CWC ba kynnoh donkti ia ka KSU halor ka jingshah pyniap ha Ichamati

Syllad | The Rising MeghalayaApril 1, 2024

Ka Seng Federation of Khasi Jaintia and Garo People (FKJGP) ha ka 30 tarik mynta u bnai ka la maham tyngeh ia u president ka Coordination and Welfare Committee (CWC) Shella Block u Gopal Dey halor ka jingkynnoh donkti ia ka Khasi Students’ Union (KSU) ha kaba iadei bad ka jingjia shah pyniap ba dang shen jong ki arngut ki nongtrei bylla kiba dei ki bar jylla ha Ichamati, East Khasi Hills District.

“Ka dei ka kamram jong ki pulit ba kin wad ia ka jingshisha, ym une u president ka CWC u Gopal Dey,” ong u Secretary General ka FKJGP u Bah Eldie N Lyngdoh lyngba u kyrwoh.

“Ha ka jingshisha ki bor pulit kim pat shym la ioh kem satia ia ki briew kiba donkti halor ka jingjia shah pyniap jong u dkhot ka KSU u Bah (L) Lurshai Hynniewta lane ia u heh pulit uba siat iap ia u Bah Cherishterfield Thangkhiew. Ngi kwah ban buh jingkylli shano une u briew u don ha ka por ba jia ka jingshah pyniap jong u Bah (L) Lurshai Hynniewta,” u la ong.

“Namar ba une u briew u la dawa ban kem mardor ia ki briew kiba donkti halor katei ka jingjia shah pyniap jong kitei ki arngut ki bar jylla, kumta ruh u dei ban dawa mardor na ka bynta ban kem ia kito kiba donkti ha kaba pyniap ia u Bah Lurshai.Kumta ngi maham tyngeh ia une u Gopal Dey,” ong u nongialam ka Seng.

Shuh shuh une u nongialam ka Seng FKJGP u la ong ba ka Seng kan mih shakhmat ha ka 7 tarik u Iaiong kum ka dak ban pynpaw pyrshah ia ka jingthmu pynlong jingiakhih shong kyllain mungor da ka kynhun Meghalaya Linguistic Minority Development Forum hapoh Khyndailad, Shillong.