Maham ka High Court ban khot hajir ia u CS bad Commissioner Secretary DCA

Syllad | The Rising MeghalayaFebruary 26, 2024

Ka iingbishar High Court ka Meghalaya ka la maham ban khot hajir pyrshah ia u Chief Secretary ka sorkar Jylla bad ia u Commissioner & Secretary ka Tnat District Council Affairs ka jylla lada ym don ki ban wan mihkhmat na ka liang ka jong ki haka jingpynsngew (hearing) kaba saw kaba iadei bad ka jingtian bishar halor ka jingpynkhein ia ka hukum ka iingbishar

Ka iingbishar ka la pynmih ia kane ka hukum haba pynsngew halor ka jingujor pynkhein hukum ba la ujor da ka JHADC Staff Association pyrshah ia ka Barcelona Bamon, Secretary JHADC, Chief Secretary Meghalaya bad u Commissioner & Secretary District Council Affairs Department ha ka 21 tarik u Rymphang ba la dep.

Na ka liang ka iingbishar ka la shimkhia halor kane ka jingbym wan mih na ka liang ka sorkar jylla ha ka jingshim bishar halor ka jingpynkhein ia ka hukum ka iingbishar wat hadien ba la pynlong ka jingpynsngew ia ka jingshim bishar ha ka sien kaba lai.

Ia ka jingpynsngew kaba nyngkong la pynlong ha u bnai Nohprah u snem ba la dep bad ka jingpynsngew kaba ar ha ka 6 tarik u bnai Rymphang ba la dep.

Katkum ka hukum jong ka iingbishar la ong, la dep pyntip sha kiba shah ujor ha kaba iadei kane ka bynta, kata kynthup ia u Chief Secretary ka sorkar Meghalaya bad u Commissioner & Secretary, District Council Affairs Department hynrei ym shym la don satia ki ban wan mihkhmat na ka bynta jong ki.

Ka iingbishar ka la shimkhia bha halor kane ka kam. “Lada ym don ki ban wan mihkhmat ha kawei pat ka tarik ba la pynbeit, kitei ki arngut ki heh sorkar da lade hi kin hap ban wan hajir,” ong ka hukum ka iingbishar.

Na ka liang ka iingbishar ka la ai por biang sa ar taiew na ka bynta ban file ia ka affidavit kumba la kyrpad da u muktiar uba la mihkhmat ia ka Barcelona Bamon.