Maham ka HNLC ia ki paid Hynniewtrep ba ka Sixth Schedule bad Article 371 ki dei tang ka jingriam sain pyrthei

Syllad | The Rising MeghalayaFebruary 1, 2025

Ka Seng Hynniewtrep National Liberation Council (HNLC) ha ka 1 tarik u Rymphang ka la ong ba ka Sixth Schedule bad ka Article 371 kim dei kiei kiei ruh hynrei tang ka jingriam kam sain pyrthei.

“Ki paid Hynniewtrep ki dei ban kyndit bynriew na ka jingshisha kaba kham triem: Ka 6th Schedule bad ka Article 371 kim dei kiei kiei ruh lait na ka jingriam kam sain pyrthei, ki kynjri ba la ai rong ksiar, ka ruh ba la shna pynaram. Ki dei kiba la shna pynwandur bha ban thok ban shukor bad pynngeit ia ngi ba ngi la ioh ei ei, hynrei ka jingshisha ka long ba ngi dang shah pyniaid ha ki rukom synshar nongwei. Kine kim dei ki jingjop hynrei ki jingteh jingkhum sain pyrthei kiba mut ban pynhun ia ngi katba ka jingsynshar ka jong ngi ka la bteng ban shah tuh noh,” ong u General Secretary cum-Publicity Secretary ka HNLC, u Bah Sainkupar Nongtraw ha ka kyrwoh.

U la ong ruh, “Hynrei, ngi u Hynniewtrep ngi dei ban kylli ia lade ba hato ngi dei kiba khlem ka khyndew ka shyiap? Naduh ki por hyndai hynthai ngi la longtrai ia ki jong ki jaka puta, ia la ka kolshor bad ka nusuba jong ngi. Lada ngi dei ki bym don la ka jaka puta lehse ka lah ban long kaba don jingmut ba ngi nkyrpad ba ngin ioh ia ka jingshakri kaba bha hapoh ka rukom synshar ba la pyntreikam. Hynrei kane kam dei satia ka jingshisha.Ngim shym la wad jingisynei lane ki jingmyntoi na ki bor nongwei – ngi pynskhem ia la ka jong ka hok kaba hiar pateng kum ka ri.”

“Ka Sorkar India ka kyntait ban ithuh ia ka jaka shong tynrai jong ngi, hynrei don kiba lehkmen halor ka 6th Schedule, kaba la pulom ban kdup ia baroh ki jaka puta jong ka Bri u Hynniewtrep- Kumno ngin sngewhun ia ka jingpyniaid shiliang ia la ka jong ka jaka puta? Balei ban dawa ia ka Article 371 haba ka Assembly ka dang iakhleh lang bad ki Garo, Bengali bad kiwei kiwei kaba la pyntlot ia ka bor synshar khdar jong ngi? Balei ban dawa ia ka Articlce 371 na ka bynta ka Meghalaya kaba dang ialeh klet ia ka hok ban synshar hi bad shim rai hi da lade da u Hynniewtrep? Ban pdiang ia ka kyrdan laitluid lane ia ka kyrdan ba kyrpang ka long kumba pdiang ia ka along kaba la pynkhreh lypa. Ka sorkar India kan pynlong ia ngi ban sngew long kongsan, hynrei kan ym ailad satia ia ngi ban long laitluid. Tang u biej uba bakla ia u kynjri ksiar jong ka jinglaitluid,” ong u Bah Sainkupar.

U la bynrap ruh, “Ka histori jong ngi ka long kaba shai-La thmu ban pynduhjait ia ki tnad tynrai jong ngi. U Bah JJM Nichols Roy, watla u dei u Khristan uba bha, hynrei um shym la long u nongsynshar ri uba bha na ka bynta ki briew jong ngi. Ki jingmut jingpyrkhat jong ka synshar phareng jong u ka la pynlong ia u ban pyntlot ia ki Syiem jong ngi, da kaba tip ba kiba bun na ki Syiem jong ngi ki dei ki dei ki nongbud jong ka Niam Tynrai. Kane kam dei kaba shu jia ryngkhat hynrei ka dei kaba la pyrkhat sain hima kaba janai ban knieh noh ia ka jingsynshar ba laitluid jong ngi ia ka Hynniewtep. Ha kata ka por ki nongialam jong ngi ki la iapait iapra – kawei ka kynhun ba la ialam da u Bah Joy, kawei da ka Federation of Khasi States (FKS). Mynta kito kiba dang iai bteng ban ialehkmen ne dawa ia ka 6th Schedule ne ka Article 371 ki la shu pdiang beit ia ka jingthok jong ka jingsynshar phareng, kata da kaba bakla ia ki jingshah teh kynjri ka jong ki kum ka jingkiew shaphrang.”

Nalor kata u Bah Sainkupar u la ong ruh, “Ha ka ri ka jong ngi la pynhiar kydan ia ki Syiem tang kum ki nongialama, bad ka bor ki Syiem jong ngi la pynhap hapoh ka jylla bad ka sorkar, kaba dei ka nuksa kaba pyni shai kdar ia ki jingleh arsap ia ki it ki hima ban  pynneh ia la ka jongka synshar syiem haba knieh noh ia ka jingynshar jong kiwei pat.”

“Ynda ngi la ioh bat ia ka kyrdan sain pyrthei jong ngi, ka HNLC kan thaw ia ka dorbar tynrai ka ban pynneh pat ia u Syiem ha ka kyrdan kaba dei hok jong kum u ki kum u khlieh jong ka ri da kaba pynskhem biang ia ka jinglong trai ki briew jong ngi bad ban burom ia ka jinglong nongialam bashisha jong ngi,” u la bynrap.