Maham ka HNYM ia ka Karbi Students Association ban kham tyngkan ia u thylliej

Syllad | The Rising MeghalayaAugust 21, 2023

Ka Hynniewtrep National Youth Movement (HNYM), West Jaiñtia Hills District, kala kyntu bad maham jur ia ka Karbi Students’ Association (KSA) ba kan tyngkan iala u thylliej hashwa ban padiah khlem baiwai, kata da kaba byrngem ban wanrah ka thma iapher Jaidbynriew hapdeng ki khun ka Bri U Hynñiewtrep bad ki Karbi.

U kyrwoh lyngba u President u Leoferdinand Suïam ka maham jur ruh ia kitei ki seng samla pule ba kim dei ban pyntieng ia ki paradoh parasnam jong ngi kiba shong basah ha ki thain khappud bad ka Assam, namar lada ka KSA ka sdang, na ka liang jong ka HNYM ruh kam banse ban pynphai kylliang lada ki nud shisha ban wanrah ia kata ka thma iapher Jaidbynriew kumba la kren da ki nongialam ka KSA ban pynlong kum ha ka jylla Manipur.

Na ka liang ka HNYM ka la ong  ka la long kaba la pynkhreh bad ka ap tang ba kin sdang, kata namar ka seng kam kwah ban iohi ba ka snam jong ki paradoh parasnam kan shu lyngkien khlem da ioh ban kput kylliang.

Kumta ka HNYM hi ka kyrmen ba ka sorkar Meghalaya ka kham sngewthuh kham bha ia ka jingeh ka ban bud lada kam lah ban iada ia ki paradoh parasnam jong ngi kiba don ha ka thain Block 1 Block 2.

Nalor kata ka HNYM ka la ong ruh ba ka la long kaba la pynkhreh ban iatyngkhuh ha kano kano ka por bad kino kino ki bor kiba na bar kiba thmu ban pyntieng pynsmiej ia ki paradoh parasnam jong ka Bri U Hynñiewtrep, bad ka Seng ka kyntu ruh ia ki paradoh parasnam ba kim dei ban tieng ban smiej da leilei ruh ia kine ki jingbyrngem byrsit namar ba lada ki ktah ia ki para ri, ngin nym don jingmap iano iano ruh na ka bynta ban ai jingiada iala ki jong ki paradoh parasnam.