Maham ka HSPDP halor ka suk ka sain lada shah pynlong Yatra ia ka Seng Hindu

Syllad | The Rising MeghalayaSeptember 17, 2024

Ka Hill State People’s Democratic Party (HSPDP) haka 17 tarik Nailur ka la maham halor ka jingsyier ia ka shongsuk shongsain lada ka Sorkar kan shah ban pynlong ia ka ‘Yatra’ jong ka Seng Hindu kaba thmu ban pynbna ia ka Masi kum ka Kmie jong ka Ri ia kaba la pynbeit ban pynlong ha ka 2 tarik u Risaw ha ka Nongbah Shillong.

Ha ka shithi sha u Myntri Rangbah ka Jylla u Conrad K Sangma, u President ka HSPDP Youth Wing u Bah Korbariang Syiemlieh u la ong, “Ngi kyrpad jur ia phi ban pyrshah sani namar kane ka lah ban pynmih ia ka jingiakynad ha ka imlang sahlang, ka lah ban mih ka jingpynkhihwin bad ka jingpynkhein ain khamtam nalor ka jingdon bynta lang jong ki kynhun Gau Rakshak ka wanrah ka jingsngewkhia kaba jur ia ki nongshong shnong ka Jylla kiba pynpaw pyrshah ia ka jingthmu kaba sha lyndet halor ka jingpynlong ia kane ka Yatra.”   

Nalor kata u la ong ba kane ka lah ruh ban pynmih ia ka jinglong jingman ka ban pynbitar ia ki nongshong shnong bad ka ban pynmih ia ki jingjia ki bym sngewtynnad bad ia kiba donkam ba phin hap ban pyrkhat sani.

“Kumta namar kane ka jingsyier kaba don hakhmat ngi kyrpad ia ka ophis ka jong phi ba kan kyntait ban aijingbit na ka bynta ban pynlong ia kane ka yatra kumba la pynbna da ki nongpyniaid jong ka seng Hindu, bad ban khmih ruh ba kino kino ki yatra ne ki jingleh jingkam ha ka jylla dei ban leh da ka jingburom lang ia baroh ki Jaidbynriew bad ki nongshong shnong jong ka” ula bynrap.