Maham ka HYC ia kiba kdat iaka ishu jaidbynriew sha ishu niam, dawa na ki Pulit ban kem mardor iaki nongialam ka LRO

Syllad | The Rising MeghalayaOctober 23, 2020

Ka  Hynniewtrep Youths’ Council (HYC), kala pynpaw ia ka jingbitar kaba jur halor ka jingkynthoh bad jingbyrngem jong ki riewshimet bad ki seng bapher bapher kiba dei na ka jaidbynriew Bengali ban kynshoit bad pyrshang ban kdat iaka ishu jaidbynriew sha ka ishu pynshit niam.  

U Robertjune Kharjahrin President HYC ula ong “nyngkong eh kine ki briew kim dei ban klet ia ka jingjia ha Ichamati, Elaka Mawlong ha ka 28 tarik u Rymphang jong une u snem ba ki briew kiba dei ki Khar Bengali ki la mih da u shnong ban shoh ban dat ia ki paradoh parasnam ki jong ngi ha kaba ngi la duhnoh wat ia ka mynsiem ba kordor jong uwei u dkhot jong ka Jaidbynriew jong ngi u Bah Lurshai Hynniewta. Ki dur bad ki Video kiba la saphriang kylleng halor katei jingjia ha hatei ka sngi ki paw shynna ba mano kiba pynkulmar bad kiba leh beaiñ. Watla da ki spah ngut ki briew kiba don bynta ha Katei ka jingjia ki lah paw tyngkrein kiba rah ia ki wait ki sum ki nar bad kiwei kiwei ki tiar pynmynsaw, hynrei ym baroh na kine ki la shah kem haduh mynta ha ka jingshisha tang 8 ngut ba shah kem.”

“Ngi kwah ban pynkynmaw ia kine ki seng jong ki Bengali bad ki riewshimet na bar Jylla  ba kim dei ban tuklar ia ki kam pohing jong ka Jylla ka jong ngi namar kim tip ia ka sdang ka kut jong kiei kiei. Hapoh ka Jylla ka jong ngi haduh mynta kam pat ju don kano kano ka jingujor pyrshah leh donbor ia kino kino ki rit paid ha ka niam (Religious Minority),” ong shuh shuh u Robertjune.

“Ka jingpynkhih shnong jong ki Bengali na Assam bad West Bengal ka lah ban dei namar ki Assembly Election ki ban sa long shen ha kine ki Jylla.  Ngi Maham ba kim dei ban milai jaktung ia ka kam pohing  ka jylla Meghalaya bad ka election jong ki. Lada ki kwah ban leh politik ia kane ka kam da kaba wanrah ia ka jingsngewpher niam ne Jaidbynriew kidei ban kiar na kaba mushlia la ka kam jong ngi hynrei kidei ban pynbeit jingmut hapoh ki Jylla lajong,” la ong une u nongialam ka HYC.

U Bah Robertjune ula ong shuh shuh “Ka Jaidbynriew Hynniewtrep kam pat klet ba dei ki Bengali bad ki Non-Tribal kiba la pynthud ia ka Jaidbynriew Hynniewtrep naduh u snem 1947 ter ter, kila pynthud ia ka Khasi National Making Dorbar, ki la pyrshah ban ioh Jylla ki riewlum, ki dawa Union Territory ia ka Shillong ban lait na ka Jylla Meghalaya, ki la iakhun mukotduma ban pynduh ia ka Trading by Non-Tribal Regulation shaduh Supreme Court, ki la pyrshah doh iap ia ka Meghalaya Land Transfer Act bad ngi tip shai ba dei kine ki ba pynthud na ka por sha por ia ka jingdawa ILP bad ki wei ki ain iada Ri ha ka Jylla Meghalaya.”

U General Secretary HYC Roykupar Synrem ula ong b aka ka Seng ka pynrem jur ruh ia u Tathagata Roy ia ka jingkren lap lah jong u ha kine ki sngi kiba pynpaw ba  imat une u briew u kren kat shaba lap ba shem bad lehse u don jingduna ha ka jingmut jingpyrkhat jong u. “Ngi kyntu ia u Tathagata Roy ba un sngap noh, um dei shuh ban kren ia ki kam ka jaidbynriew Hynniewtrep ne Jong ka Jylla namar ioh lehse u lah klet ba um dei shuh u Lat la Jylla Jong ngi.”

Ka HYC ka maham jur ia ka seng buaid Niam ka Legal Rights Observatory (LRO) ba kim dei ban sdang ka jingkynshoit ia pher niam ha ka Jylla ne ka Ri India hi baroh kawei.

U Synrem ula ong “Ka jingkren tohmet jong kane ka seng buaid Niam ia ka Balang Presbyterian ka long kaba ngim lah ban pdiang bad pynrem jur. Ngi kyntu ia ki pulit ban kem mardor ia kine ki nongialam bad ki dkhot ka LRO halor ka jingkynthoh ia ka Balang Presbyterian bad ka jingpyrshang jong ki ban pynmih ka thma niam ha ka Jylla bad India hi baroh kawei.”

Ka HYC kala pynrem bad pyrshah ruh ia ka Sushmita Dev kaba long ka heh jong ka Mahila Congress halor ka jingkynnoh ba khlem nongrim ka jong ka pyrshah ia ka Jaidbynriew ka jong ngi. Kane ka briew ka shu kwah ban leh politik namar ka election Assembly Assam. La maham ka ba kam dei ban mushlia than ia ki kam pohing ka jylla bad kadei ban pynbeit jingmut ia ka Jylla lajong.