Maham ka KSU ia kiba iasylla ban thaw klumar ha khappud Assam Meghalaya

Syllad | The Rising MeghalayaJuly 2, 2022

Ka Khasi Students’ Union (KSU) Laskein Cricle kala maham ia kino kino ki briew kiba thmu ban thaw klumar ne pynthud iaka shongsuk shong saiñ ki paid Khasi Pnar ha ki jaka ba iakhajia ha khappud Assam Meghalaya kiba hap ha Block-I.

Ka KSU kala shim ia kane ka rai haka sngi Saitjain hadien ba la saphriang ka khubor jingbyrngem byrsit u wei u nongKarbi ia u wei u jaid bynriew Pnar. Ka KSU kala kynnoh ba uwei u Prophet Tisso uba na ka thain Jrikyndeng ula byrngem ia u Comingson Dkhar u chairman ka Labang Nongphyllut Pangam Raliang Area Committee.

Ka KSU kala kynnoh shuh shuh don ki para doh para snam na ka jaidbynriew Khasi Pnar kiba iasylla ban thaw klumar bad ka don kawei ka seng thymmai kaba tip kum ka United Khasi People Organization (UKPO) iakaba la lamkhmat da u Niwel War kaba sdang ban pynkhih iaka jingmut jingpyrkhat ki nongshong shnong ha Block I da kaba phon pah ban iasoh noh bad ka Assam.

Ka KSU kala kynnoh shuh shuh ba une u Prophet Tisso ula byrngem ba lada jia eiei iaki paid Karbi, u Comingson Dkhar na Moojem u hap ban kitkhlieh namar udei ma u, u nongpynbor iaki Khasi Pnar ba shong basah hapoh Karbi Anglong ban rah iaka vote sha Meghalaya bad khang ruh ban thep vote haka KAAC election ba dang shu dep.

Kumta ka KSU Laskein hadien bala saphriang kane ka jingbyrngem byrsit ha ki khubor paidbah (social media) kala maham ban leh tyngeh ia kino kino kiba thmu ban thaw klumar bad iasylla ban wanrah jingklumar bad ktah iaka shongsuk sain ki paidbah ha katei ka thain,.