Maham ka Myntri ba ka Sorkar kan leh da kaba tyngeh pyrshah ia ki kam lehnoh

Syllad | The Rising MeghalayaAugust 23, 2023

Na ka liang ka Myntri ka sorkar Jylla ka Kong Ampareen Lyngdoh mynta ka sngi ba Ar ka la mahan tyngeh ba ka Sorkar Jylla kan shim da ki sienjam kiba tyngeh na ka bynta ban tehlakam ia ki kam lehnoh ha ka Jylla.

Haba kren sha ki lad pathai khubor, na ka liang ka Myntri ka la ong ba kin ym ailad satia bad ban ieng pyrshah ia kiba kum kine ki kam kiba beain.

Ha kajuh ka por na ka liang ka Myntri ka la ai ruh ka jingkhublei ia ka tnat pulit kaba la trei borbah ban ioh kem noh ia ki 11 ngut ki nongialam kynthup ia ki dkhot jong ka kynhun kieng atiar kaba dang shu mih thymmai ka National Liberation Council of Nongkyndong (NLCN) ha kane ka taiew ba la dep.

“Nga ai khublei kyrpang ia ka tnat pulit kaba la shim ia kane ka sienjam kaba dei eh, bad ruh ba kane ka jingshah kem ba dang shen kan long ruh ka khubor kaba shai kdar na ka bynta kiwei pat,” la ong ka Myntri.

Shuh shuh haba kylli, na ka liang ka Kong Ampareen kala ong “Ngam lah ban pyniasoh ia ka jingbym iohkam iohjam namar ka jingbym iohkam ka dei ka jingeh kaba ktah ia baroh ki ri ka pyrthei hi baroh kawei. ki lah ban dei ki ri kiba la kiew ha ka roi ba par lane  phi lah ban dei na ka ri kaba duk hynrei ka jingshisha hi ka long ba phin don beit ki pateng ki ba dang hap ban iashim bynta ha ka lympung iakhun kam iakhun jam, bad  tang namar ba ym donkam don jam kam don nongrim ba phin shu kiengatiar noh”.