Maham ka Panaliar ïa kiba leh khlem akor bad leh jakhlia hapoh u pud u ang ka shnong

Syllad | The Rising MeghalayaDecember 11, 2019

JOWAI: Ka Dorbar Shnong jong ka Shnong Panaliar ka maham ïa kino kino kiba leh khlem akor bad leh jakhlia hapoh u pud u ang ka shnong Panaliar.

U Waheh Shnong ka Dorbar Shnong Panaliar, U Ma Riquoma Rq. Laloo, ula ong ba ka Dorbar Shnong Panaliar ka pdiang sngewbha ïa baroh ban wan kai leit kai hapoh u pud u ang jong ka shnong, hynrei la mana ba ym bit ban leh kino kino ki kam khlem akor bad ban leh jakhlia da kaba bret pathar ïaki jaboh plastic bad kiwei kiwei ki ñiut kat shaba lap bashem.

Ha kaba ïadei bad ka jingbam khana ha ki bynta ka Wah Myntdu bad Syntu Ksiar la kyntu ba hadien bala dep bam khana dei ban pynkhuid bad pynlang pynlum ban pynneh ïaka jingkhuid jingsuba ka Syntu Ksiar bad ki nbynta jong ka Wah Myntdu ha baroh shilynter.

“Ka Syntu Ksiar kadei ka jaka jngohkai bad ka jaka shangkai ha kaba naduh ki khynnah haduh ki rangbah ki wan kai sha kane ka jaka, kumta kino kino kim bit ban kren khlem akor ne thaw klumar ha kane ka jaka khnang ban ban pynneh ïaka burom jong ka shnong ka thaw bad ka sor Jowai baroh kawei,” la ong u Ma Riquoma.

Ka Dorbar shnong ka khot ïatreilang ïa baroh bad kyntu ban bud ïaki aiñ shnong bad kino kino kiba pynkhein ïaka aiñ shnong kin shah pynshitom.