Maham ka Seng Kur Dkhar Jaintia Hills ia kiba ai jait klumar sha ka kur Dkhar

Syllad | The Rising MeghalayaOctober 8, 2023

Ka Seng Kur Dkhar, Jaintia Hills Central Body ka la shim ia kane ka lad ban pynshai paidbah ha kaba ia dei bad ka khubor ba la mih ha ka 1 tarik bad 2 tarik Risaw, ba u Ratan Dkhar ba shong ba sah ha Ummulong West Jaintia Hills u la shah kem ha ki pulit ka East Jaintia Hills halor ki kam khaii beain jong u ia ki dawai jyrhoh thok ne phensedyl u la kam ia lade ba u del na ka kur ka jait Dkhar kumba la paw ha ki khubor bad social media.

Te ha kaba iadel bad kane ka jingkam jong u, ka Seng Kur Dkhar Jaintia Hills ka don ban pynshai kumne. Hadien ba ka Seng Kur Dkhar Khliehtyrshi Circle kala wan ban tohkit bniah ia u ryngkat bad ka Central Executive Committee ka la lap ba une u briew um dei satia na ka kur ka jait Dkhar, hynrei u dei u bar jylla (Non-tribal) na ka jait Sarkar. Kumta ka Seng Kur Dkhar Jaintia Hills Central Body ka la pynrem jur la u bad u la del ban weng noh shisyn don ia ka kur ka jait Dkhar na ki kot ki sla (Documents) jong u baroh naduh ba la pynmih ia kane ka khubor, lym kumta ka Seng Kur kan leh ia u da kaba tyngeh kat kum ki kyndon jong ka kur bad ka aiñ sorkar.

Ha ka juh ka por ka Central Body baroh kawei lyngba u President jong ka u H.C Dkhar bad u General Secretary jong ka u H.H Dkhar kila maham tyngeh ia kito kiba ai kot pynshisha (Documentary proof) ia ka Kur Dkhar sha ki wei pat khlem da ioh bor na ka Seng Kur Dkhar, bad kum juh ruh lada dang don ki briew kiba shim kur ne ai kur klumar sha ka kur Dkhar ban myntoi shimet ki dei ban weng noh mynta mardor shisien don ha shwa ba ka kur kan lap la ki, khnang ba kin lait na ka jingpynshitom na ka kur bad na ki bor jong ka Ain.