Maham ka Sorkar ban leh tyngeh ia ki nonghikai kiba ai kam bujli ha ki skul Sorkar

Syllad | The Rising MeghalayaFebruary 11, 2025

U Myntri ka Tnad Pule Puthi ka Jylla u Rakkam A Sangma ha ka 10 tarik Rymphang u la maham ban leh da kaba tyngeh pyrshah ia kito ki nonghikai kiba ai kam bujli sop sop ha ka kam hikai jong ki sha kiwei pat ha kylleng ki skul sorkar ha ka Jylla.

“Lada ngi ioh pdiang ia kino kino ki jingujor, na ka liang ka sorkar kan shim ia ki sienjam kiba tyngeh pyrshah ia kito ki nonghikai namar ngi la kyrpad ia ki nonghikai ba lada phi la aplai kam ban long nonghikai sngewbha long ki nonghikai,” ong u Rakkam haba kren sha ki lad pathai khubor.

“Ka sorkar kan sa pynmih ruh ia ka jingmaham kaba tyngeh ia ki heh kiba dei khmih bad pyniaid ia ki skul ba ka dei ka jingkitkhlieh jong ki lada ki shah ban thungkam bujli namar hadien ba pyndait ia ka Teachers Information Management System (TIMS), phim hap ban shim ia ka jingkitkhlieh,” u la bynrap.

Katkum ka jingong ka jong u, ki nonghikai kim lah satia ban thungkam bujli iano iano ruh ha ka jaka ka jong ki.

U la ong ruh ba ki don bun ki skul kiba la thung ia ki nonghikai bynrap da ka jingpynlut hi na lade ban pyndap ia ka jingduna ki nonghikai. “Hynrei phim lah ban thung iano iano ha ka jaka jong phi, kane ka long kaba bakla,” u la ong.

Haba kyntu ia ki nonghikai ba kim dei ban leh ia kum kane ka kam kaba long beain, une u Myntri u la ong, “Lada phi don kino kino ki kam ba kyrkieh phi lah ban pan da ka shuti katkum ka lynti kaba dei, kane ka dei ka jingkyrpad ka jong nga.”