Maham ka Sorkar ia kiba pyniaid iew beain ha ka kyrteng u Shynrai Lakadong

Syllad | The Rising MeghalayaOctober 31, 2024

Ka Sorkar Jylla ka la maham ba ka jingthung ia u Shynrai Lakadong (Lakadong Turmeric) shabar ka East bad West Jaintia HIlls na ka bynta ban pyniaid iew ha ka kyrteng jong u Shynrai Lakadong yn shim ba ka long kaba beain hapoh ki kyndon 22.1 bad 22.3 jong ka Geographical Indications of Goods (Registration and Protection) Act, 1999.

Ia kane la pyntip lyngba ka jingpynbna paidbah ba la pynmih da u Dr Vijay Kumar, Commissioner and Secretary, ka Tnad ka Rep ka riang ka Sorkar Jylla.

Katkum kane ka jingpynbna paidbah, u Registrar jong ka Geographical Indications (GI), Chennai u la ai ka jingithuh lyngba ka shap ne Gl tag no. 741 na ka bynta u Shynrai Lakadong kaba hap ha ka kyrdan 30 ‘spice turmeric’ ba la register ha ka kyrteng jong ka Lakadong Turmeric Cooperative Union Limited ha Jowai, West Jaintia Hills -793150, Meghalaya ha u bnai Lber 2024.

U Kumar u la ong ba kane ka jingithuh ka long shisha ka jingsarong bad ka long ruh kaba kongsan na ka bynta ban iada ia ka jinglong tynrai jong u Shynrai Lakadong.

Ka jingpynbna paidbah ka pyntip ruh ba ka kyrdan GI ba la ai na ka bynta u Shynrai Lakadong ka ieng na ka bynta ban iada ia ki rukom treikam bad ki jingtip tynrai, kata ka ban pynthikna ba dang u Shynrai Lakadong ba la pynmih na ki jaka puta kiba hap hapoh West Jaintia bad East Jaintia Hills ki lah ban pyndonkam ia ka GI tag.

Hynrei, namar ka jingpawkhmat bad ka jingiaid iew jong u Shynrai Lakadong hapoh ka ri bad ki iew kiba shabar, kumta ruh ka la don ka jingsngewkhia halor ka jinglah ban pyndonkam bakla ia kine ki shap bad ban pyniaid iew ia ki mar ki bym dei satia na ka tyllong ba la pynmih na ka Jylla kum u ‘Lakadong Turmeric’.

Nalor kata ka Tnad ka la ioh jingtip ruh halor ki khubor kiba iadei bad ka jingpyniaid iew ia u shynrai kiba la pynmih na shabar ka Jylla ha ka kyrteng jong u Shynrai Lakadong.

Ka jingpynbna ka la ong ruh na ka bynta ka bha ka miat bad ka jingmyntoi jong ki nongrep kiba shisha bad ki nongpyndonkam ba la ai bor bad ba la register, kumta ruh tang ki nongpyndonkam ba la pynrung kyrteng kumba la kdew ha ka Chapter 1, section 2, sub-section 1 (n) and sub section 1 (b) ki don ia ka hok ban pyndonkam ia kane ka shap ‘Lakadong Turmeric’.

U Kumar u la ong ba yn shim ia ki lad jingpynshitom pyrshah lada lap ia kino kino ki briew kiba pyndonkam bakla ia kane ka shap kumba la kdew ha ki kyndon 38, 39 bad 40 jong kane ka Act.