Maham ka tnat pulit ban leh da kaba tyngeh halor ki kam beain ha ki bynta khlaw Lawmali, Shillong

Syllad | The Rising MeghalayaNovember 14, 2023

Ka Tnat pulit ka jylla haka sngi Nyngkong ka la maham ban leh da kaba tyngeh pyrshah  ia kino kino kiba donkti ha ki kam beain ha ki bynta jong u lum jingtep bad jaka khlaw kiba hap hapoh Lawmali, Shillong.

Ha ka jingialang kaba la long hapoh Police Reserve Conference Hall hapdeng ki bor pulit bad ki rangbah shnong kiba kynthup ia ki dkhot napoh ka shnong  Riatsamthiah, Wahingdoh, Jaiaw Shyiap, Jaiaw Mihngi bad Mawlai Phudmuri la iakren halor ka jingjur jong ki kam beain ha kitei ki jaka ha Lawmali kiba la wanrah ka jingsngewkhia kaba jur ia ki shnong ki thaw kiba don marjan jong ka Lawmali.

Na ka liang u SP (City) u Bah Vivek Syiem u la ong ba ka jingialang ka la shim ia ka rai ban khanglad ia kiba kum kine ki kam bymman ha ki bynta khlaw Lawmali bad lada lap ia kiba donkti ha ki kam beain, kata kum ha ki kam khaii ne dih drok ne kyiad kin ngat ha ka jingshah pynshitom.

“Shibynta ban khanglad ia ka jingioh rung laitluid da kiba kum kine ki riew bymman ha kine ki bynta jong ka khlaw kiba hap hapoh ka Tnat Forest, ia ki mat kiba iadei bad ka jingker bad ka jingshna ia ki khyrdop jaka rung yn sa iathir bniah bad ka Tnat Forest,” ong u SP.

Nalor kata u Bah Vivek u la ong ruh ba kin shim ruh ia kiwei pat ki sienjam, kata ban pynngat ia kito kiba donkti ha ki kam beain ha ki por mynmiet myniong ha ki bynta jong kane ka khlaw, kata pyrshah ia kiba dih kyiad ne drok hapoh ki kali ha ki bynta surok hapoh ki kyndon Section 110 Meghalaya Police Act bad NDPS Act.

U la ong ruh ba na ka liang ka tnat pulit ka ai ka jingiaroh ia ki dkhot jong kitei ki dorbar shnong halor ki sienjam kiba ki la shim ban iatreilang da ka jingthmu ban weng ia kine ki jingeh kiba ktah jur ia ka imlang ka sahlang hi baroh kawei.

Shuh shuh u la ong ba ha kane ka sngi la iakren ruh halor ka jingshyrkhei ha ki kam khaii bad pyndonkam drok ha ka nongbah Shillong ha kaba kiba bun ki nongiashim bynta ki la ai jingmut lang halor ki lad ki lynti ban tehlakam ia kine ki kam bymman kiba la khie rasong ha ka nongbah Shillong hi baroh kawei.