Maham pynshitom ka Panaliar ia kiba pynwit iaki Tngaw Capped Langur

Syllad | The Rising MeghalayaSeptember 16, 2021

Ka Dorbar Shnong Panaliar, Jowai kala maham ia kino kino kiba pynwit pynthud iaki tngaw Capped Langur kiba la wan poi hapoh shnong ha kine ki khyndiat sngi.

Kine ki tngaw kila mih pyrthei naduh u snem 2020 harud ka Wah Myntdu bad kila kiew sha ki jaka ba shong briew ha Jowai.

Mynta ka kynti ruh kila wan ha Panaliar ban bam iaki soh kiba don harud ka shnong kiba don ha katei ka jaka.

U Waheh Shnong Panaliar Riquoma RQ Laloo ula kyntu iaki nongshong shnong ban sumar ia kine mrad kiba la jan duhjait bad ym dei ban pynwit pynthud iaki ne ban siat iaki. Ula ong ka dorbar shnong lada lap ia kino kino kiba ialeh pyrshah kan pynshitom katkum ki aiñ shnong bad ban aiti ruh iaki sha ki bor jong ka aiñ.

U Ma Laloo ula khot ka jingiatreilang jong baroh kum ka dak ban pynneh pynsah ïa kine ki mrad khlaw khnang ban pynneh pynsah bad ban pynitynnad iaka sawdong sawkun ka mariang.