Maham tyngeh ka DM ka East Khasi Hills ban pynieng ia kino kino ki khyrdop lum khajna beaiñ

Syllad | The Rising MeghalayaNovember 1, 2023

Ka District Magistrate ka East Khasi Hills District haka sngi ba Ar ka la maham tyngeh halor kano kano ka jingpynieng ia ki khyrdop khrong khajna beain ne da kiwei pat ki rukom lum pisa jubor ha lynter ki surok bah National Highway, State Highway bad kiwei pat ki lynti surok b kongsan hapoh East Khasi Hills.

Ka District Magistrate ka la pynmih ia kane ka jingmaham khnang ban khanglad ha kaba iadei bad ka jinglait rud ka pisa paidbah namar ka jingdon jong kine ki khyrdop lum khajna kiba beain.

“Na ka liang ka ophis ka la ioh pdiang ia kiba bun ki jingujor halor ka jingdon jong ki khyrdop lum khajna kiba beain ha lynti ka surok bah National Highway, State Highway bad ki lynti surok ba kongsan ka East Khasi Hills,” ong ka District Magistrate.

Ha u kyrwoh la ong ruh ba na ka liang ka sorkar jylla ka ieng skhem bad ban ym don jingmap ha kaba iadei bad ka jingdon jong kino kino ki khyrdop lum khajna beain ne kiwei pat ki rukom lum pisa ba beain lyngba ki kali kiba iaid lyngba ka surok National Highway, State Highway bad ki surok ba kongsan hapoh  East Khasi Hills.

Kane jingpynmih ia kane ka hukum ka la wan long ruh shisngi hadien ba ki pulit ka Laitumkhrah Police Station, kila kem noh ia uwei u Nongialam ka seng Hynniewtrep National Youth Front (HNYF), uba donkti ban lum pisa beain na ki trok kit mar khnang ba kin ioh iaid lyngba ka jingkieng Damsite, Umiam.

Nalor kata ka District Magistrate ka pynpaw ruh ba ka jingpynieng ia kine ki khyrdop lum khajna ba beain na ka bynta ban lum pisa jubor ka wanrah ruh ka jingthud ha kaba iadei bad ka leit ka wan jong ki kali, ka jingbym sngewsuk hapdeng ki nongleit nongwan da ki kali bad kaba buh jingma ruh na ki jingjia tyngkhuh kali.

Kumta kino kino kiba leh pyrshah kin ngat ha ka jingshah pynshitom katkum ki kyndon ain.