Maham tyngeh ka FKJGP-WJH halor ka jingthmu ka NFR ban wanrah lynti rel ha Rilum Jaintia

Syllad | The Rising MeghalayaFebruary 23, 2025

Ka Federation of Khasi Jaintia & Garo People (FKJGP), West Jaintia Hills District ka la kren shai sha ka Sorkar Pdeng bad ka Northeast Frontier Railway (NFR) ba kim dei ban wanrah ia ka lynti rel ha Rilum Jaintia katba kim pat lah ban wanrah ia ki ain kiba khlain ban iada ia ka jingwan rung kyrthep jong ki briew kiba na bar.

Kane ka jingmaham jong ka seng ka la wan long ruh hadien ka jingsakhi lyngba ki lad pathai khubor ba ka Northeast Frontier Railway ka don ia ka jingthmu ban sorjamin biang ha Rilum Jaintia na ka bynta ban pynkloi ha kaba iadei bad ka jingthmu ban wanrah ia ka lynti rel ha kane ka thain.

Ka FKJGP lyngba u kyrwoh ka phah ruh ia ka khubor kaba shai sha ka NFR ba kam dei ban phohsniew ia ka lynti rel ha Rilum Jaintia bad ka seng FKJGP ka long kaba la khreh ban pyni bor lada ka don ka jingpyrshang ban pyniaid shakhmat ia kane ka jingthmu.

“Ka NFR kam dei ban pyrshang ban leh tam ne pyni bor namar ngin ym ailad da lei lei ruh ban pyniaid shakhmat ia kane ka jingthmu wanrah lynti rel hapoh kane ka thain, kata wat lada ka sorkar ka pyrshang ban pyni biang da ka bor kumba ka la jia ha kine ki khyndiat bnai ba ladep,” maham ka seng FKJGP, WJH.

Na ka liang ka seng ka kyntu ruh ia ka JHADC ba kam dei satia ban ai No Objection Certificate (NOC) sha ka NFR na ka bynta ka lynti rel katba ka sorkar kam pat lah ban wanrah ia ki ain kiba khlain ki ban iada ia ngi ki jaidbynriew rit paid na ka jingwan rung kyrthep ki briew kiba na bar sha kane ka Bri u Hynniewtrep.

Kane ka jinpyrshah jong ka seng ka la wan long ba hadien ka jingmih ka khubor ba ka NFR ka thmu ban sorjamin ia ka lynti rel na Bhoksong, Rajagaon, Baithalangso, Jengkha, Kherani bad Umrangso ka ban pyniasoh haduh Jowai.