Maham tyngeh ka Tnat Pulit ia kiba niah kali buaid ha kine ki sngi lehkmen

Syllad | The Rising MeghalayaDecember 20, 2023

Shibynta ban khanglad ia kino kino ki jingjia ba sngewsih kiba lah ban wan jia lyngba ki jingniah kali shongshit ha ryngkat ka jingdih buaid ha kine ki sngi lehkmen ki ban wan na ka liang ka Tnat Pulit ka la maham ban leh da kaba tyngeh pyrshah ia kiba pynkhein ain.

Na ka liang u Superintendent of Police (City), EKH, u Bah Vivek Syiem IPS u la ong ruh na ka tnat Pulit Traffic ka Nongbah Shillong kin pynlong mardor ia ki jingtalasi ha ki bynta bapher bapher ka nongbah kynthup ha ki surok Bypass, surok highway bad ki surok shnong.

U la ong ruh ba ki bor pulit kin kham pynleit jingmut ruh ha kaba iadei bad kito kiba niah kali shongshit hapdeng ka jingdih buaid kaba buh jingma ia ki mynsiem briew bad kaba long ruh pyrshah ia ki kyndon jong ka Motor Vehicles Act.

Kumta la maham tyngeh ba lada lap ia kito kiba niah kali hapdeng ka jingdih buaid yn pynshitom hapoh ki kyndon Section 185 Motor Vehicles Act ha ryngkat ka kuna kaba long T.10,000 lane ka jingshah set along kaba lah ban kot haduh hynriew bnai lane baroh ar ki jingpynshitom.

Kumta la kyntu ia ki nongniah kali ba kin long kiba phikir bad ban kiar na ki jingdih pynbuaid ha ka por ba niah kali ym tang na ka bynta ka jingshngain ia lade hynrei na ka bynta kiwei kumjuh