Maham tyngeh ka Tnat Pulit ia kiba shim ‘overtake’ lyngba ka jingkieng Damsite

Syllad | The Rising MeghalayaJanuary 2, 2024

Ka Tnat pulit ka buh ka jingmaham kaba tyngeh ia ki nongniah kali kiba dei ban iaid lyngba ka jingkieng Damsite (Umiam) ba kim dei ban shim overtake.

Na ka liang u Superintendent of Police (City), u Bah Vivek Syiem haka sngi ba Ar u la ong namar ba ka jingmaramot ia ka jingkieng Damsite ka dang iaid shakhmat, kumta la pyllait ia ki kali na baroh arliang kum ka one way lyngba kane ka jingkieng.

Hynrei la sakhi ba ki don katto katne ki kali kiba shim overtake haba ki iaid lyngba kane ka jingkieng kaba la wanrah shuh shuh ia ka jingdheng kali kaba jur.

Kumta khnang ban pynthikna ia ka jingiaid beit bad ka jingshngain ha ka leit ka wan ula kyntu jur ia ki nongniah kali ba kim dei ban shim overtake.

Ha ka juh ka por u maham ruh ba kino kino kiba pynkhein ia kane kin ngat ha ka jingshah pynshitom katkum ka ain.

Shuh shuh khnang ban pyllait na ka jingkhapngiah ha ka leit ka wan jong ki kali kiba thmu ban iaid lyngba ka jingkieng Damsite bad ban kiar na ka jingdheng kali, na ka liang u SP u kyrpad ia ki nongniah kali ba kin iaid na kiwei pat ki lynti lyngba ka Shillong Bypass.