Maham tyngeh ka Tnat Pulit ia kiba siew pisa sha ka Seng HNLC, GNLA

Syllad | The Rising MeghalayaMarch 23, 2024

Ka Tnat Pulit ka Jylla ha ka 23 tarik mynta u bnai ka la pynmih ia ka jingkyntu paidbah da kaba bthah ia kito ki briew kiba shah dawa pisa ha ki seng kieng atiar ba la shah khein beain ba kim dei satia ban siew sha kiba kum kine ki kynhun.

U Director General of Police (DGP) u Dr LR Bishnoi lyngba u kyrwoh u la ong ba ki bor pulit ki la ioh jingtip ba ki don bun ki briew ki ba la shah dawa pisa ha kiba kum kine ki kynhun, kata kum ka Seng kieng atiar  Hynniewtrep National Liberation Council (HNLC), ka Garo National Liberation Army (GNLA) bad kiwei pat lyngba ki rynsan social media bapher bapher, kata kum ka (Whatsapp, Telegram/SMS bad kiwei).

Une u heh pulit u la ong ruh ba ka long kaba donkam ia ki nongshong shnong ba kin tip ba ka jingai jingiarap pisa ne jingkyrshan ia ki seng lehnoh ba la khein beain la ka long ha kano kano ka rukom ka dei ka kam bymman katkum ka ain.

“Kiba kum kine ki jingai jingkyrshan ym tang ba ka wanrah ia ki kam ialeh pyrshah ri hynrei ka buh jingma ruh ia ki mynsiem brie ba lui lui bad ia ki kam shongshngain ha ka imlang sahlang.Kano kano ka jingiarap pisa sha kiba kum kine ki kynhun ym tang ba ka pynkhein ia ki kyndon ain, hynrei ka khanglad ruh ia ki jingpyrshang ryngkat lang ka jong ngi ban iada ia ka ri na ki kam lehnoh bad na ki kam pyntriem,” ong u Bishnoi.

Da kaba kyntu ia ki paidbash ba kin kiar ban pisa sha kino kino ki briew ne kynhun seng, u DGP u la ong ba ka jingsiew sha kiba kum kine ki kynhun beain kin ngat ha ki jingshah pynshitom hapoh ki kyndon sections 11, 13 & 17 of Unlawful Activities (Prevention) Act, 1967 bad kumjuh ha ka Section 4 jong ka Prevention of Money Laundering Act bad Section 109 IPC.

 Shuh shuh u la ong ba kito kiba shah dawa pisa ki dei ban aijingtip sha ki bor pulit khnang ba kin lah ban leh ia kaba donkam bad ruh ban buhrieh ia ka kyrteng bad ia ki jingtip shaphang jong ki.