Maham u CM ba ka sorkar kan ym ailad ia ki kam dawa pisa beain jong ka HNLC

Syllad | The Rising MeghalayaMarch 7, 2024

U Myntri Rangbah ka Jylla u Conrad K Sangma ha ka 6 tarik Lber, u la ong ba na ka liang ka sorkar ka pynpaw shai ba kan ym ailad satia ia kino kino ki kam dawa pisa beain jong ka Seng Hynniewtrep National Liberation Council (HNLC) kin dang iai bteng hapoh ka jylla.

Haba kren sha ki lad pathai khubor, u Sangma u la ong, “Hadien ba kane ka mat ka la poi sha ka jingiakren, ngi la pynlong ia ka jingialang ha kine ki khyndiat taiew ba la lah. Ngam lah ban iathuh bniah halor kane ka jingialang, hynrei ngi la bthah ia ka Tnat pulit ba kan iaid shakhmat bad leh ia kaba donkam ban pynthikna ba kum kine ki kam beain kim dei satia ban wan jia shuh nangne shakhmat.”

U la ong ruh, “Da kaba pynshong nongrim halor kane, ki bor pulit ki la leh ia la ka jong ka kamram.Ki la iaid shakhmat bad phin iohi ia ki kam dawa pisa kiba la jia ha ki por kiba la dep ki la paw pyrthei bad wat ki briew ki lah ban iathuh ha phi. Hooid ki don shibun ki kam kiba dei ban leh hynrei ki sienjam kiba pura ki la iaid shakhmat.”

U CM u la ong ruh, “Mynta ngi la don hapdeng ka kam bad ngin pynthikna ban pynsangeh mardor ia kiba kum kine ki kam dawa pisa beain bad yn ym don ki nongshong shnong ki jong ngi ki ban shah ktah lyngba kane ka kam beain.”

Lah ban kdew ba dang shen ki pulit ki la ioh ban kem noh ia u PSO jong ka seng HNLC na ka nongbah Shillong ha kaba ki la kam ruh ba lyngba ka phone ka jong u kaba ki la ioh kurup ki la lap ia ki sakhi satar halor ki kam dawa pisa beain na kiba bun ngut ki briew.

Halor ka jingkylli, u CM u la ong, “Hooid ka dei ka jingshisha ngi la pynpaw shai sha ka seng HNLC ha kiba buntylli ki jingiakren lyngba ki ksiang ba lada ki don shisha ia ka jingangnud ha kaba iadei bad ka jingiakren, kumta ruh ka dei ban pynsangeh ia kiba kum kine ki kam beain namar ki la don teng ruh ki jingjia kiba la jia dang shen ruh ia kiba Ngam kwah ban iathuh bniah, hynrei watla katta ngi la dep ban iakren bad ki ha ki por kiba la dep bad mynta ruh ngi iai ban ba katba ngi dang don ha ka lynti ban pyniaid shakhmat ia ka jingiakren iasuk kiba kum kine ki kam beain ki dei ban sangeh noh shisyndon.”

Ha kaba iadei bad ka jingthmu ban pynkhie im biang ia ka kynhun kieng atiar GNLA ha Garo Hills, na ka liang u CM u la ong ba ki la don laingut ki briew ki la shah kem noh bad mynta ki pulit ki dang pynlong ka jingbeh thong ban ioh kem sa ia laingut kiwei pat, kata da kaba thikna ruh ba shen yn sa ioh kem noh ia ki.