Maham u DC-EJH ia ki nongshong iew bym wah ia ki dor jong ki mar ki mata

Syllad | The Rising MeghalayaDecember 23, 2023

U Deputy Commissioner (Supply) East Jaintia Hills District, Khliehriat da kane u kyntu ia baroh ki nongshong iew shonghat bad nongshong dukan ba ki dei ban bud ryntih ia ki jingbthah ba la pynmih, kata ban buh ne wah man ka sngi ia ki jingthoh kiba iadei bad ki dor jong ki mar ki mata ba kongsan hakhmat ki dukan jong ki.

La maham ruh halor kano kano ka jingdie palat ia ka dor ne ka jingleh thok ia ka dor ba la print ne (Maximum Retailed Price) jong ki mar ki mata ba kongsan, kata la ki dei kiba la la song ne ki bym song la khang pyrshah bad dei ruh ban ai da ki cash memo kiba biang sha ki nongthied nongpeit bad ym tang ha i kot lyngkhot.

Ka jinglum thup ne ka jingpyniaid iew beain ia ki mar ki mata ba kongsan la khang pyrshah. Baroh ki nongkhaii bar jylla ki dei ban don ia ki laisen khaii kiba treikam bad kiba la ioh na ki bor sorkar ba dei khmih.

Nalor kata la kyntu ruh ia ki nongdie kiba buh ia ki mar bam mar dih ki dei ban don ia ka FSSAI laisen kaba treikam kaba la ioh na ka ophis jong ka Tnat Food Safety Officer, East Jaintia Hills District, Khliehriat.

Shuh shuh la kyntu ruh ia ki nongshong iew ba ki dei ban pdiang ia ki pisa khutia, bad lada lap ia kiba pynkhein ain bad ialeh pyrshah yn shim ia ka jingpynshitom katkum ki kyndon ain.