Maham ujor mukotduma ka JSU, kynnoh bamsap T.5.78 Klur ha JHADC

Syllad | The Rising MeghalayaJune 13, 2020

Ka Jaintia Students’ Union(JSU) – Central Body ka la dawa mardor na ka District Council Affairs (DCA) Department jong ka Sorkar Jylla halor ka jingsuba pyndonkam bakla ia ka pisa T. 5.78 klur tam ha Jaintia Hills Autonomous District Council (JHADC) .

Ka JSU ka la pynpaw ka jingsngewkhia ba jur halor ka jinghiran ka pla tyngka jong ka JHADC haduh u pud ba kam lah shuh wat tang ban siew ia ka tulop ki nongtrei jong ka mynta la hyniew bnai tam haduh ba ka la pynlong ia ki nongtrei jong ka konsil ba kin pynlong jingiakhih.

Ka JSU na ka por sha ka por ka iai bud dien ban lap na ki ei ki daw ba pynlong ia ka jinghiar ka ioh ka kot jong ka konsil. Ka JSU kala kam ba kala lap ba ka daw ba hiran ka pla tyngka ka konsil ka dei na ka jingbamsap hapoh ka JHADC ka long ka ba jur bha bad la lap ba kane ka EC ba la ialam da u T Shiwat kum CEM JHADC ka pyndonkam bakla ia ka pisa kumba T.5.78 klur tam

Ha kaba phai sha ka budget session jong ka JHADC kaba la long ha Ka 15 April 2020, u EM incharge jong ka tnad Taxation, u Winning G Sungoh u la iathuh ba ki kali kitmar ki ba ki ioh bat ha ki artylli ki check point jong ka konsil ki ba don ha Mookyndur bad Ratachera-Umkiang kiba iaid beain naduh ka 1 July 2019 haduh 29 Feb 2020 ki long 21,019 tylli bad ka kuna ba iohlum na ki artylli ki check point naduh 1 September 2018 haduh 29 February 2020 kalong T. 4,83,300/-.

Hynrei pynban kat kum ki sakhi sabut bad ki jinglap jong ka JSU ba baroh ki kali ba iaid khlem ki kot ki sla ki ba biang (illegal) kiba ki nongtrei jong ka konsil ki ioh bat naduh Ka 1 September 2018 haduh 29 February 2020 kilong baroh 58,293 tylli.

Ki kali ba ioh bat ka JHADC
1 September 2018 to 28 February 2019 kilong 22587.
1 March 2019 to 30 June 2019 kilong 14,687.
1 July 2019 to 29 February 2020 kilong 21,019.
Total baroh ka long 58,293.

Namar kat kum ka aiñ jong ka Jaintia Hills Autonomous District Council – Trading by non-tribals Regulation Act 2011 ka kdew shai ba kino kino ki kali ki ba pynkhein ia ka ain kin hap ban siew T.1000 kawei ka kali. Te ynda la khein jingkhein ia ka pisa kaba dei ban mih ka long 58,293 × 1000 = Rs 5,83,29,300/-

Hynrei kaba sngewphylla pat kalong ba ka jubab jong u EM incharge pat u ong ba ka fine ba ki ioh na duh Ka 1 Sept 2018 haduh Ka 29 February 2020 kalong tang Rs. 4,83,000 (saw lak phra phew lai hajar tyngka).

Kane ka paw shai ba ki pyndonkam bakla ia ka pisa ka ba shong dor haduh kumba T. 5,78 Klur tam kat kum ka jingkhein ba kdew hangne (Rs. 5,83,29,300 – Rs. 4,83,000 = Rs. 5,78, 09,700).

Halor kane ka jingsuba pyndonkam bakla ia kane ka pisa ka JSU ka dawa na ka tnad DCA jong ka sorkar jylla ba kan phah tohtik bniah halor kane ka jingpyndonkam bakla ia katei ka pisa jong ka JHADC da kane ka EC kaba mynta khnang ban lap ia kiba donkti.

“Ka JSU kala pynkreh ban ujor da mukotduma namar ba ngi don ki sakhi satar ki ba biang halor kane ka jingbamsap,” ong u President jong ka  JSU, u Lawyerson War.