Mana ka MCC iaki Myntri Sorkar ban leit ialap elekshon da ki kali ML-01 ne kular ai skim thymmai ne buh mawnongrim thymmai

Syllad | The Rising MeghalayaJanuary 28, 2025

Khnang ban wanrah ia ka elekshon MDC kaba khuid kaba suba bad kaba ym noh shiliang shano shano, ka tnat District Council Affairs jong ka Sorkar Jylla ka la mana pyrshah ia ka jingpyndonkam jong ki kali sorkar (ML-01) bad kali bala thoh Govt of Meghalaya) bad kali jong ki JHADC ne KHADC ha ka por ba leit ialap elekshon ne ha kano kano ka rukom haba iadei bad ka eleshon MDC.

Shuh shuh la khang pyrshah ia ka jingpyndonkam jong ki kali Sorkar Jylla ne kali JHADC ne KHADC da kino kino ki kyrtong ba iakhun elekshon MDC naduh bala pynbna ia ka elekshon MDC bad haduh da kut ka elekshon MDC.

Kitei ki jingmana ka long katkum ka Model Code of Conduct (MCC) bala pyntreikam naduh ka sngi Nyngkong mynta ka taiew hadien ka jingpynbna jong ka Elekshon sha ka ïing Dorbar Thawain jong ka JHADC bad KHADC ka ban long ha ka 21 tarik u bnai February mynta u snem.

Ki myntri sorkar jylla bad ki briew kiba la shah thung ha ki kyrdan kum Chairman, Vice Chairman, Co Chairman bad Political Advisor, u Chief Executive Members, Chairman, Vice Chairman bad Executive Members jong ka JHADC ne ka KHADC kim bit ban ialap elekshon ha ka por ba ki leit official visit sha kino kino ki jaka bad kim beit ban pyndonkam ia ki nongtrei sorkar bad ki tiar ki tar ki kali sorkar ban leh kino kino ki kam elekshon.

Katkum ka MCC ia ki jaka paidbah kum ki madan ialehkai bad kiwei kiwei dei ban shah pyndonkam lang kumjuh da baroh ki kyrtong ne seng sain hima sima ym tang ban pyndonkam da uwei u kyrtong ne kawei seng sain hima sima.

La mana ia ka Sorkar Jylla ban pynmih kino kino ki jingpynbna ne advertisement ha ki lad pathai khubor ha ka jinglut jingsep jong ka Sorkar bad la mana ban pyndonkam ia ki tnat pathai khubor jong ka sorkar ha kano kano rukom na ka bynta ka elekshon MDC.

Katkum ka MCC ka la khang pyrshah ia ka jingsdang jong ka jingtei ne jingpyntreikam kaba thymmai jong kano kano ka skim bala ioh da ka District Council na ka Sorkar Jylla ne Sorkar Kmie hadien bala pynbna ia ka elekshon MDC. Kum kitei ki skim dei ban sdang pyntreikam hadien ka elekshon hynrei la ban bteng ia kino kino ki skim kiba la sdang lypa shwa ka jingpynbna jong ka eleshon.

Katkum ka MCC la bthah ban pynsangeh kano jingbuh mawnongrim ne jingplie paidbah jong kino kino ki skim bathymmai da ka District Council haduh da dep ka eleshon MDC.

Shuh shuh la bthah ban pynsangeh shwa haduh da dep elekshon MDC ia ka jingpynbna jong kino kino ki skim bathymmai jong ka District Council ne kano kano ka jingai kam kontrak ne pynbeit kam thymmai bad kino kino ki riew shimet ne kynhun.

Ka tnat District Council Affairs ka pyntip bala la pyllait ka jingkhot tender ne jingpyntreikam jong kino kino ki skim na ka Sorkar Jylla ne Sorkar Kmie na ka jingpyntreikam jong ka MCC. Hynrei la mana ia ka jingpyllait thymmai jong kano kano skim na Skim MLA ne Skim MP ha ka por eleshon MDC. La mana ia ki kyrtong ne ki nongbud jong ki ban rah pisa palat ia ka Sanphew hajar bad lada lap yn shah knieh noh.

Katkum ka MCC, Ki myntri Sorkar Jylla ne kino kino ki bor jong ka Sorkar Jylla, ki MLA ne Chief Executive Member ne Executive Member bad ki bor jong ki District Council kim lah ban ai pisa ne kino kino ki jingiarap pisa ka Discretionary Funds naduh bala pynbna ia ka elekshon MDC

Naduh bala pynbna ia ka eleshon MDC, ki Ministers /MLAS/CEMS/EMS/MDCs ne kino kino ki bor sorkar ne District Council kim la ban ai kino kino ki jingkular ban ai jingiarap pisa ne buh maw Nongrim jong kino kino ki projek ne skim ne ai kino kino ki jingkular ban shna surok thymmai ne ai skim umbam umdih bathymmai ne kino kino ki jingkular ai jingiarap kiba lah ban khring vote na bynta u ne ka kyrtong jong ka party ba synshar ia ka jylla.