Mana ka shnong Ialong ban rung klumar ki briew kiba na bar shnong

Syllad | The Rising MeghalayaJuly 16, 2020

Ka Village COVID-19 Management Committee, jong ka shnong Ialong, West Jaintia Hills kala kyntu ia baroh ki paidbah kiba wan shapoh shnong Ialong ban deng iaki mask haba wan bad pyndep ia kino kino ki jingdonkam jong ki hapoh shnong Ialong.

U Ma Bishar Shylla, Waheh Shnong Ialong ula ong ba ki dang bun ki briew kiba leh pyrshah iaka jingbthah jong ka sorkar bad khlem kino kino ki jingiada ne deng iaki mask ki wan shapoh shnong poh thaw bad nakaliang ka shnong bad ka COVID-19 management committee ngi pyrshah jur ia kane.

Ula ong ba nangne shakhmat ba kino kino ki briew kiba wan donkam shapoh shnong Ialong lada kim deng ia ki mask, ka bha ia ki ba kin nym wan shapoh shnong bad la mana ruh iaki briew kiba wankai khlem kino kino ki kam shapoh shnong ha kum kane ka por ba jur ka jingsaphriang ka khlam COVID.

Ula pyntip ruh ba ha kaba iadei bad ki rawon kiba leit khwai ha Wah Myntdu ka bor shnong kala rai ban shah tang haka por 6 baje mynstep haduh 6 baje janmiet bad la kyntu ia baroh ki nongleit khwai bad bud ryntih iaka jingbthah jong ka sorkar bad ban deng iaki mask bad iada ialade bad iakiwei na ka jingiabit khlam.

Shuh shuh ha kaba iadei bad ka jingwan kai pyngngad sha ka park bad ki jaka jngohkai ka shnong ruh ym pat shah ia kino kino ban wan bad la kyntu ia baroh ban iatreilang bad ka bor shnong.