Mang ka sorkar 344 klur ban iada iaka wah Umiew bad ka Ganol: CM

Syllad | The Rising MeghalayaFebruary 19, 2024

U Myntri Rangbah Conrad K Sangma haka 19 tarik Rymphang haba kren haka dorbar mang tyngka ula ong ba ka sorkar kala mang T. 344 klur na ka bynta ban ai jingïada ïaki jaka ba wan ka um ne catchment area ka Umiew ha East Khasi Hills District bad ka wah Ganol ha rilum Garo Hills.

Ïa kane u Myntri Rangbah ula ong haba jubab iaka jingkylli ha iing dorbar, u Conrad K Sangma, u la ong ruh ba kane ka project ka dei kaba kyrshan pisa kiba nabar (Externally Aided Project) bad la dep plie paidbah ha kane ka taiew.

“Kane ka dei ka sienjam ba radbah ban ai jingīada na ka bynta ka wah Umiew bad ka Ganol catchment area”, la ong u Myntri.

Hadien kane u Myntri Rangbah u la ong ba ka sorkar jylla Meghalaya ka dei ka ba nyngkong na ki sorkar ban don ïa ka water policy bad ki don bun ki projek kiba la thmu ban ai jingīada bad tyngkai ki tyllong um ha ka jylla 

“Ngi dei ruh napdeng khyndiat tylli ki jylla kiba treikam lang bad ka North Eastern Space Application Centre (NESAC) bad shim jingkhein haduh 50,000 tylli ki umpohliew”, la ong u Myntri Rangbah.

U la pyntip ruh ba ka sorkar kala rai ban shna haduh 400-500 tylli ki jaka pyllang um.

U Myntri Rangbah u la ong ruh ba ka sorkar kala khmih bniah halor ka jingeh ha kaba ïadei bad ka um, hynrei kam dei kaba suk hapdeng namar ka jingkylla ka suiñbneng.

Hashuwa kane na ka liang u nongïalam ka liang pyrshah u Bah Ronnie V Lyngdoh u la kyntu ïa ka sorkar ban ai jingïada na ka bynta ki jaka ba wan ha wah Umiew.

U la ong ba ka wah Umiew ka dei kaba la sdang tyrkhong namar ka jingbym shim ki sienjam ban ai jingïada ba jur ka jingpom pathar ïa ki khlaw ki btap ha kiba bun ki jaka.

U MLA ka Mawsynram, u Bah  Olan Sing Suin u la ai jingmut halor ka jingdonkam ba ka sorkar kan shim ki sienjam ban ai jingïada ïa baroh ki tyllong um kiba don ha manla ki shnong.

Na ka liang u Myntri PHE, u  Marcuise N Marak u la ong kiba bun ki tyllong um kiba la sam sha ki thliew ïingbriew hapoh ka Jal Jeevan Mission ki dei ki um ba paw shabar bad ki um ba don shapoh khyndew.

“Ban pynduna iaka jingshaniah um tang na ka wah Umiew ha Mawphlang kaba long ka thymmei jong ka Greater Shillong Water Supply Scheme, ka don ka jingtyrwa ban tan um sha New Shillong Township pat na ka wah Umkhen,” u la ong.

Ula pyntip ba ka sorkar kala shim bun ki sienjam ban pynbha bad pynjanai ki tyllong um. Ha kaba ïadei bad ka JJM, ngi la shim jingkhein da kaba leh geo tagging ia baroh ki tyllong um khnang ban ioh shim iaki sienjam kiba donkam”. 

Shuh shuh une u Myntri u la pyntip ruh ba kam shim la don satia ka por ban pyndep iaka jingpyntreikam JJM, hynrei la buh hapoh u Lber 2024.

U MLA ka Congress na Mawhati u Bah Charles Marngar, uba kwah ban ioh jingtip la ka sorkar kan ai umphniang ne em halor ka jingpump um ha kaba iadei bad ka jingpyntrei iaka JJM ha ka jylla, u Marak u la ong ba un jubab ynda la dep tohkit thikna bha shuwa.