Mang ka sorkar ban pynlut T. 23 klur na ka bynta ka jingpynlong ia ka Meghalaya Games ha Tura

Syllad | The Rising MeghalayaDecember 15, 2023

U Myntri ka Tnat Sports and Youth Affairs ka sorkar jylla, u Bah Bah Shakliar Warjri ula ong ba ka jingpynkhreh na ka bynta ka jingpynlong ia ka Meghalaya Games 2024 kala iaid bha shakhmat ha kaba la mang T.23 Klur na ka bynta ban pynlong ia kane ka lympung ialehkai ka ban long ha Tura, West Garo Hill kaba jop.

Haba kren sha ki lad pathai khubor haka 14 tarik Nohprah, u Myntri ula ong ba ka jingpynbit pynbiang ka dang iai bteng bad na ka liang ka jong u da lade hi u la leit jurip lah kumba 6-7 sien ban pynthikna na ka bynta ka jingbit jingbiang jong baroh ki nongwan iashim ki ban don haduh palat 3000 ngut.

U la ong ruh khnang ban pynthikna ba kane ka lympung ialehkai ka ban sdang ha ka 15 tarik bad kut ha ka  20 tarik u Kyllalyngkot 2024, kan long iaid beit iaid ryntih bad kaba jop kumta ruh u la bishar bniah halor baroh ki jingpynkhreh khnang ba kan ym buh jingeh ia ki nongwan iashim bynta.

Nalor kata u Bah Shakliar u la ong ruh ba ha kane ka lympung ialehkai kin don haduh kumb 22 tylli ki jait jingialehkai, kata da ka jingthmu ban kyntiew ia ki samla ha ki kam ialehkai sports bapher bapher khnang ba kan lah ruh ban iohlad ban leit iashim bynta haduh ki National Level. “Kane ka jingmang ban pynlut 23 klur ka ka kynthup ruh ha kaba shna bad marmot ia ki jaka ialehkai, ki jaka sah, ka bam bad ka leit ka wan nalor kiwei kiwei pat ki jingdonkam,” u la ong.

Shuh shuh u Myntri u la pynpaw ruh ba na ka liang ka sorkar ka la shim ia ka rai ban kynthup ruh ia ki jait jingialehkai tynrai kiba kynthup ia ka ‘Maw poin’ kaba dei ka jingialehkai ba la rim bah jong ki trai shnong riewlum hapoh Khasi Hills, kata kynthup ia ki jingialehkai tynrai jong ki Jaintia bad Garo ia kiba ym pat shym ia ka rai khatduh. Ka jingkynthup ia kine ki jingialehkai u la ong ka long ban kyntiew ia ka kolshor ba riewspah lyngba ki jingialehkai sports.