Mang ka sorkar T.100 klur na ka bynta ka CM CARE Programme 2024-25

Syllad | The Rising MeghalayaFebruary 22, 2024

U Myntri Rangbah ka Jylla u Conrad K Sangma u la pynbna ia ka mang tyngka kaba T.100 klur na ka bynta ka Chief Minister CARE Programme ia kaba yn pyntreikam ha une u snem 2024-25.

Ia kane u CM u la pynbna hapoh ka iingdorbar thawain haka 21 tarik Rymphang, haba wanrah ia ka mang tyngka jong ka Jylla na ka bynta kine ki ar snem ki ban wan.

Na ka liang une u Myntri u la pyntip ba ia ka CM CARE program la sdang pyntreikam ha u snem 2022 da kaba khmih halor ki jingpynioh jingmyntoi sha ki hynriewphew hynriew hajar ngut ki riewtymmen (senior citizens), laiphew hynriew hajar ki longkmie bym don nongkyrshan (single mothers) bad khatsaw hajar na ka bynta ki briew kiba don jingduna ha ki dkhot met.

U Sangma u la pynpaw ruh ba kawei na ki kam ba kongsan kaba nyngkong eh jong ka sorkar MDA ka dei kaba la shim naduh kine ki hynriew snem kiba la leit noh, kata ban khmih halor ka jingpynbiang ia ki bai bam tymmen ne pension na ka bynta ki riew tymmen, ki longkmie bym don nongkyrshan bad na ka bynta ki briew kiba don jingduna ha ki dkhot met.

Wanrah u CM ia ka Mang Tyngka ba duna T. 2,029 klur, phaikhmat ban kyntiew ia ka ioh ka kot sha ka 10 billion USD

Shuh shuh u la ong ba ka jingkiew jong ka ioh ka kot bad ka roi ka par kan lah ban long kaba don jingmut tad lada kiba kum kine ki kynhun nongshong shnong hapoh ka imlang sahlang kin ioh ia ka jingkyrshan bad ka burom.