Mang ka Sorkar T.26 klur ban pyndep ia ka Jowai Market Complex ha Iawmusiang

Syllad | The Rising MeghalayaOctober 29, 2024

Ka Sorkar Jylla ka la mang ia ka song pisa kaba T.26 klur na ka bynta ban shna pyndep noh ia ka Jowai Market Complex kaba la ap khmih lynti la slem bha hapoh Iawmusiang.

Ia kane la pyntip da u Chief Executive Member (CEM) ka Jaintia Hills Autonomous District Council (JHADC) u Ma Thombor Shiwat, ha ka jingplie paidbah ia ka Jaintia Durbar Hall ha ka 29 tarik u Risaw ha Loomsooiung, Jowai.

“Ka Sorkar Jylla ka la mang ia ka song pisa kaba T.26 klur na ka bynta ban shna pyndep ia ka Jowai Market Complex. Kane ka la wan urlong namar ka jingtrei borbah jong kane ka Executive Committee ba mynta kaba la iakynduh na ka por sha ka por ia ka Sorkar ha kaba iadei bad kane ka phang,” ong u CEM.

Ka Iawmusiang ka dei kawei na ki iew kaba heh tam bad kaba la rim tam hapoh ka thain bad ka dei kaba la don naduh ki por jong u Syiem Jaintia. Ka jingtyrwa ban shna pynbha ia kane ka iew kala ioh ia ka jingmynjur naduh u bnai Naitung 2006.

Na ka liang ka Ministry of Development of North Eastern Region (DoNER), ka la mang ia ka song pisa kaba T.20.09 klur na ka bynta kane ka iew ha kaba ka la dep ban pyllait ia ka instalment kaba nyngkong kaba long T.6.33 klur ha ka 10 tarik u Rymphang 2009.

Dei ha ka 4 tarik u Rymphang 2020 ba u Myntri Rangbah ka Jylla u Conrad K Sangma u la leit jurip ia kane ka jingtei kaba la shu ieh khlem da lah ban pyndep ha kaba u la pynbna ruh ia ka rai jong ka Sorkar ban mang pisa na ka bynta ban bteng biang ia kane ka jingtei katba dang ap ia ka instalment kaba ar na ka Sorkar Pdeng.