Mang ka sorkar T.30 klur na ka bynta ka CM-CONNECT ban aijingshakri sha ki paidbah

Syllad | The Rising MeghalayaFebruary 22, 2024

Ka sorkar Jylla ka la mang T.30 klur na ka bynta ban pyntreikam ia ka CM-CONNECT, Family ID lem bad kiwei pat ki jingai jingshakri sha ki paidbah nongshong shnong ka Jylla na ka bynta une u snem 2024-25.

Ia kane la pynpaw da u Myntri Rangbah ka Jylla u Conrad K Sangma haka 21 tarik Rymphang haba wanrah ia ka mang tyngka ka jylla.

U CM u pyntip ba na ka liang ka sorkar jylla ka la pynkhreh ban pyntreikam ia ka ‘Family ID program,’ ka ban ai bor ia ki nongshong shnong ba kin ioh ia ka jingshakri kumba la pynkhreh bad ka ban plielad ruh ia ka sorkar ba kan pynkhreh bad bishar bniah halor ki jingmyntoi kiba la pynioh.

Da kaba pynksan halor ka jingwanrah ia ka CM-Connect Program ha kaba ki nongshong shnong ki lah ban iakren markhmat bad ka sorkar lyngba ki lynti bapher bapher, kata lyngba ka jingiakynduh markhmat, lyngba ka phone bad digital, u CM u la ong ba ka jylla ka don haduh palat 7000 tylli ki shnong, bad ka jingpynioh ia ka jingshakri  lyngba ka sorkar ha ki shnong kiba pajih ka long kaba shem shitom bad ba ki briew kin hap ban duh kam duh jam ban leit sha ki block bad ki district headquarter ban ioh ia ka jingshakri lyngba ka sorkar.

Haba pynshai halor ka CM Connect Programme, u Sangma u la ong ba ka CM-CONNECT ka dei kaba la rejistar hapoh jong u helpline number 1971 bad uba la treikam ruh mynta, bad ba ki nongshong shnong ruh ki la rejistar ia la ki jingangnud ki jong ki man la ka sngi.

Ia kane ka CM-CONNECT program la pynbit pynbiang ha bun tylli ki jait ktien ha kaba ka ktien Khasi bad Garo ka dei kaba la ithuh bad ia kaba yn plie ha kine ki hynriew bnai ki ban wan.

Nalor kata u Sangma u la ong ruh ba ki dkhot nongmihkhmat jong ka CM-CONNECT program kan kynthup ia palat 10,000 ngut ki  Village Data Volunteers ia kiba yn pynioh ha baroh ki shnong ban rejistar halor kino kino ki jingeh lane kino kino ki jingkyrpad halor ki jingshakri na ka bynta ki nongshong shnong.

Shuh shuh u la ong, “Ka thong ka jong Nga ka long ba yn ym don ki nongshong shnong ki ban hap ban ieng lain na ka bynta ban ioh ia ka jingshakri lyngba ka sorkar.”