Mano ba ai jingbit ban pynieng ï’u Mobile Tower marjan u Lum Sohpetbneng

Syllad | The Rising MeghalayaFebruary 7, 2022

Ka long kaba isaitmet bad peit bad ban iohi, ba lada don kino kino ki kynja tiar bym lar kam shuh hynrei kynjreng ban ieng sah khlem da weng noh ia ki, katno tam lei lei ha ki jaka kiba la da niew kyntang bad khein burom bha ia ki.

Uwei na ki dkhot ka lum sohpetbneng committee ba dei artad mynta u President ka Seng Khasi Mawlai u bah Dipshon L Nongbri, ha kaba u la ong ba naduh ka sngi ba nyngkong, ka jingwan ban pynieng ka kompeni ia u mobile tower marjan bad u lum kyntang ka jaidbynriew u Sohpetbneng, ka long ba la shu ka jingleh lyndet jong mano re mano kiba don ha ka bor.

U Bah Dip u la pynkynmmaw ba ha ka por ka jinglong chairman ka komiti lum sohpetbeng u Rgh Sumar Sing Sawian bad u bah Dipshon Lyngdoh Nongbri kum u Secretary, marsien ia iohsngew ba don ka jingtih nongrim ban pynieng ia une u tower, la pyrkhat ba lehse kadei ka jingtei ban pynsah nam aiu re aiu, haba la kylli nangno la ioh jingbit ne permission, hynrei ka jubab ym man ban ioh satia, pynban ka la shu iai sah hapdeng jong ka umdum.

Hadien ba la shem bad iohi ia ka jingsdang ban pynieng ia une u mobile tower, u bah Dip u iathuh ba la leit ban ujor sha ophis jong ka KHADC, kaba la phah ia la u revenue officer u jong ka ban leit ban jurip ia kane ka jingkhreh pynieng ia u tower, ha kaba la ai ruh syndon wat ia ka nongmuna jong ka jingpyrshah ia ka jingpynieng ia u tower ha kliar u Lum shyllong.

Ha kum kane ka por, uwei na u Riew Tymmen Riew San u Rgh Mistin Tymthai, ba dei artad u Lyngdoh ka Sohbar ha kito ki por la leit ban pyrshah ia ka jingkhreh ban pynieng ia une u mobile tower, hynrei la kynnoh ba ki briew ba don ha ka bor, kim shym la man sngap satia ia kane ka jingujor ne pyrshah, da kumta wat hadien ba la leit ban ujor hakhmat ki bor jong ka ain briew, ia kaba kim shym laman sngap satia, la leit ruh sha ka pynsngew ka pynsngap ka kyrpad ka kyrpon ha ka dorbar Blei.

Dei halor kane ka nongrim ba u bah D.L Nongbri u ong ba  ba kumba iohi mynta paw shai shynna ba ka Blei bad ka jinglong ba kyntang jong Kliar Lum Sohpetbneng kam shah ia une u tower ba un ieng, bad kumba ka long mynta une u mobile tower u khlem shym la lah shuh ban treikam.

Na ka jingjurip u nongthoh khubor la lap ba kaei kaba u Rgh D.L Nongbri u la ong ka long kaba shisha, ha kaba ia ki kor ki bor baroh ba dei ban pyndait ne bynrap lang ha une u tower, ka kompeni kaba pyniaid ia u, ki la wan ba kin loit ki law noh lut baroh phar, bad kaba sah hi ka shu long satang ki mar jot marpei, naduh ka ka jaka pynieng ia ka kor pynmeh ding ne ka generator, ka iing ban buh ia ki tiar ki tar, baroh la shu ieh sah khongreng bad khlem da don shuh ki mar rem dor ban dang don ha kane ka jaka.

Kyntang ia wai u Rgh D.L Nongbri u kyrmen ba kito kiba dei trai ia une u mobile tower shen kin sa wan ba kin loit kin law noh ia la ki jong ki tiar ki tar ki jong ki na kane ka jaka.