Mano ba ioh pisa kiba pyrshah ne kiba iashah? Ther kylla ka KSU Narpuh ia u Vincent H Pala halor ka jingiap dohkha ha Lukha

Syllad | The Rising MeghalayaNovember 19, 2021

Ka KSU Narpuh Circle ka pynpaw ka jingsngewlyngngoh ia ka jingkynnoh u bah Vincent Pala MP Lok Sabha na Shillong Seat ia kiba pyrshah halor ka jingiap ki dohkha ha Wah Lukha, da kaba u la kynnoh ba kiba pyrshah ki dei kito kiba kwah pisa.

Ka KSU ka kwah ban buh jingkylli mano ba ioh pisa kiba pyrshah iaka jingiap ki dohkha ne kiba iashah iaka company Star Cement.

Ngi sngewlehraiñ ba kat u MP ba jied u paidbah da ka jingieit bad jingshaniah un pynmih kum ia kitei ki kyntien. Ia kane u la kren ha ka sngi ba plie ia kor Ultrasound bad Anaesthesia jong ka Dr Norman Tunnel Hospital Jowai haka 17 tarik Naiwieng.

Une u MP u kheiñ kor shibun ia ki kharkhana dewbilat ban ia ki paidbah ka jylla. Kat u MP u briew bastad ba shemphang un kren kum kine ki kyntien kaba ktah mationg ia kiba ioh sngew.

Une u MP u la iaroh ruh ia ki kharkhana dewbilat ba kim ju pynmih satia ia ki jakhlia. U la kam u tip shai lyngba ki research bad u la tikna ba ka jingiap ki dohkha ha Wah Lukha kam dei na ki karkhana dewbilat ka Star cement.

Wat u nongrep u nongbylla u tip tikna ba ka jingiap ki dohkha ha Wah Lukha naduh u snem 2007 ka dei thik na ki kharkhana dewbilat ba don ha Narpuh. Lada u MP u la dep leh research, te hato u tip haduh katno ka PH Level ka um jong ka Wah Lukha bad Wah Lunar? Haduh katno ka Copper Sulphate ka don bad ka Acidic. Nangno ki mih kine ki Copper Sulphate bad ka Acid ba pynkylla bih iaka wah.

Lada u MP u la ioh lum ia kita ki research te ngi kyrpad ia u ban pynmih paidbahkhnang ngin tip baroh. Ka seng ka lyngngoh ruh ba ha jaka ba u MP un ai jingkren ha ka jingiadei bad kita ki kor Ultrasound bad Anaesthesia bad kumno ban pynbha iaka health system haka jylla baroh kawei, pynban u kren shaphang Star Cement la kum u brand ambassador ka company ban ai certificate ba kadei ka Company kaba khuid. Kaei ka jingmut jong u ban iaroh iaka Star Cement?

Ka don jingiadei aiu ka Star Cement bad katei ki kor test jingpang, ka jingai ka jong ki ka dei lyngba ka Corporate Social Responsibility (CSR) kaba ki dei hok ban ai, kata 2 percent na ka jingioh nong jong ki bad kane ka 2 percent kam don jingmut hato kila dep maramot ia kaba kila pynjulor.

Ka seng ka kyntu ia une u MP ban kham adkar u thylliej ba kan ym pynmong ia kiwei. Ki sengbhalang bad ki paidbhah ki don hok ban pyrshah ia ka jingiap ki dohkha, ki donhok ban kynnoh ia ki company, namar ha u 2007 ka Wah Lukha ka khuid khlir khlir. Baroh ki cement plant ki don ia ki Captive Thermal Power Plant ba pynmih bording lyngba u dewiong, kito ki jaboh ba mih lyngba kitei ki Power plant shaei ki leit. Lah ban pynkynmaw ruh ba ka Topcem Cement mynshym snem kam shym la submit ia ka Water Compliance report sha ka Ministry jong ka Environment. Kane ka company ka la buhrieh ia katei ka report.

Ngi tharai u MP badonburom jong ngi u tip khambha ia kata. Ngi kynthoh hangne ba kita kiba pyrshah ki dei ki bympat ioh pisa, te kiba kyrshan imat ki la ioh pisa tharai. Ha jaka ba u MP un iada ia u paidbah, hynrei u iada pynban ia ki company, ka jingma kaba khraw ban ioh kum kine ki nongmihkhamt.

Da u KS Suchiang | President KSU | Narpuh Circle