Mano bad hangno la kem ia U Kiang Nangbah?

Syllad | The Rising MeghalayaDecember 30, 2020

Ka Shithi na U Lieutenant E.Y. Walcott, Assistant Commissioner, Nurteng, sha U Captain B.W.D. Morton, Deputy Commissioner, (dated the 3^rd January 1863.)

Katkum ka jingkyrpad jong phi nga wanrah ia ka jingthoh shaphang ka jing shah kem jong U Kiang Nangbah uba dei u nong pynshit ba ha khlieh eh bad uba long ruh u ringleader jong ka jingialeh pyrshah sorkar ha kine ki thain  rilum. Kumba ka paw ha ka shiteng bnai jong u bnai ba lalah, uwei u briew uba na ka shnong Rymphum u la wan iathuh ia uwei na ki baha iing jong u uba na ka shnong Umpara uba la shong la sah mynta ha Nyrtiang ba U Kiang Nangbah ula thiah pang la katto katne por ha Umpara. Kane ka khubor kala poi sha ki shkor jong U Mon uba long U Bor Dolloi jong ka Nyrtiang bad u paralok ba iajan eh jong u uba kyrteng U Long Sutnga kiba la wan ban iathuh ia U Lieutenant Sadlier ha ka por ba nga (Lt. E.A.Walcot) dang bun kam ban leit kem ia u khaw na ki nong ialeh pyrshah.

Ka shnong Umpara ka dei ka shnong ka barit mar khap bad ka shnong jong ki Khyrwang kaba hap hapoh ka Nyrtiang Dolloiship, ka jngai kumba 25 mer na ka shnong Nyrtiang.

Ia kane ka khubor la phah sha U Colonel Dunsford ha kaba ula hukum ia U Lieutenant Sadlier haka 24 tarik u bnai December ban leit sha katei ka jaka; ki shipai kila mih haka 25 tarik u bnai December kiba kynthup ia U Lieutenant Sadlier bad manga (u Lt. Walcott), 35 ngut ki shipai jong ka 28th bad 24th Regiment, U Dolloi jong ka Nyrtiang bad U Paralok ba iajan eh jong u U Long Sutnga, uba ialam kumba 30 ngut ki khassyahs kiba la kieng atiar bha, 8 ngut ki coolie kiba kit jing kit ia ki shipai. Ban lait na ka jing iohi ki briew ngi la hap ban iaid lynti tang haka por miet haduh mynstep ha kaba ngi lah ban iohi da ka jingshai jong u bnai bad ki khlur. Ka lynti ba ngi iaid ha kata ka miet ka long kaba suk wat la katta ruh ngi hap hi ban sangeh ban ap ia kiba wan nadien  namar ba tieng ioh ki iaid bakla na kawei pat ka lynti. Kat haduh ynda shai mynstep ngi lah pyndep palat ia ka shiteng  jong ka jing iaid lynti. Haka por sngi ngi hap ban rieh shapoh khlaw bad ngi bteng biang ia ka jing iaid lynti jongngi  haka por kumba 5 baje janmiet. Hadien ba ngi la iaid katto katne por ia ki madan lum ngi la ieh shadien ia ka shnong Moobakhon sha ka liang ka diang bad iaid lyngba ia ka shnong Namdong kaba ki briew kila phet shnong kaba hap hapoh Nangjngi dolloiship.

Hadien ba ngi iaid biang kumba shi kynta eiei ngi poi ha kawei ka khlaw bad ki phlang kiba jrong haduh ba ngi poi ha kawei ka wah kaba kham heh. Ynda ngi kam sha shilliang ngi poi ha kawei ka madan. Ynda ngi la iaid katto katne por, u nong ialam lynti ula kum bakla bad ula leit rung napoh shnong Nonglakhiat. Don katto katne ngut ki briew kiba sah ha kane ka shnong ia kiba kem bad ialam lang iaki baroh ba tieng ioh ki leit iathuh briew. Hadien ba ngi iaid sha khmat ngi poi ha kawei ka wah kaba heh ka Umcherra. U bnai u la sep sa satang ki khlur ba ai jingshai ha sahit bneng, ngi la shem jynjar bha ban iaid lynti ngi shu ia bud beit ia kiba iaid sha khmat. Ngi hap ban iaid lyngba ki siej sa kumba  san mer na ka shnong kaba ngi leit, ka lynti ka long kaba shitom bha ban iaid. Haka kynjatshai ngi iohi ia u lum ba rben bha ki khlaw bad ynda la iaid kham shajan kumba shi pawa mer eiei ngi iohi ia kawei ka tnum iing, mar kumta hi ngi iaid pynstet ban jop ia ka thong. Ka shnong Umpara ka don kumba 12 tylli ki iing kiba shna ha baroh arliang jong ka lynti, kaba la kerkut da ki khlaw ba rben kaba lah ban poi shaduh kjat lum Assam. Kumba ngi ju iohi ba bunsien ki briew ki ju ioh phet na shadien jong ki shnong, kumta ngi la pan bor na U Lieutenant  Sadlier ban ap na sha kata liang. Ymdon ksew ba wiar, ymdon ba iohsngew ia ka jing wan jongngi, baroh kiba don hangta ki dang iohthiah lyngngai. Ka iing kaba sah U Kiang Nangbah ka dei kaba khatduh na ka liang ka diang ka jaka ba don manga. Ngam tip kano iing U Kiang ha kata ka por, kynsan ryngkoh uwei u briew na kawei ka iing bad phet sha poh khlaw, nga dang mut ba dei U Kiang ba phet bad nga beh shata, namar ba ka synrang palat ka khlaw bad ki siej ki rben nga la kum ur hangta. Ngam pat lah tang ban khie haka por ba U Long Sutnga u pyrta ba u la lap ia U Kiang Nangbah. Nga iohi ba u Lieutenant Sadlier u mareh ban leit iarap ia U Long, ynda nga rung u ong ba don u briew ba iashoh hangne uta u dei U Kiang. Nga rung sha ka kamra ba don U Kiang da ka jing iarap jong u havildar jong ka 28th regiment ban pynpra ia ka jingker.

U Kiang Nangbah ula pyrshang ban siat arsien ia u Long tangba ka suloi ka khlem bthei. U Kiang u pyrshang ban iada ia lade da ka waitlam ha kaba U Lieutenant Sadlier  ula hukum ia ki shipai ban siat ia u Kiang bad hadien ba la hap ka waitlam la kem noh ia U ha ryngkat ka lok bad arngut ki khun. Ha kajuh ka por ki shipai kila rung ha kiwei de ki iing bad kem 8 ngut ki briew na Jowai, 6 tylli ki suloi kawei ka pistol kaba U Kiang u mut ban siat ia u Long Sutnga, napdeng kita 2 tylli ki suloi double barrel bad kawei ka suloi tynsah jong ka 33rd Regiment Native Infantry. Ngi leit phai haka por kumba 10.30 a.m. bad sahmiet ha Nonglakhiat. Dei hangne ba ka lok bad ki khun jong U Kiang ki lait phet. Ha ka sngi kaba bud ki mih ban leit sha Nyrtiang bad ki poi haka por  8 baje eiei mynmiet.

Haka por ba wan phai la thang noh ia kawei ka shnong kaba sah ki Jowai kaba don hapdeng ka Nonglakhiat bad ka Umpara.

Ka shithi na U Colonel H.F. Dunsford, C.B., Commanding Jynteah Field Force, sha U Captain E.K.O. Gilbert, Assistant Adjutant General of the Presidency Division, Calcutta, (No.43, dated the 31st December 1862.)

Ia U Kiang Nangbah la ialam sha Jowai haka 30th December 1862 bad la tian bishar ia U da U Colonel H.F. Dunsford, C.B,, Commanding Jynteah Field Force bad U Captain B.W.D. Morton, Deputy Commissioner. Haba kylli na kaei ka daw  ba u ialeh pyrshah bad ka sorkar, U Kiang Nangbah Ula jubab ba watla ki paidbah kim sngewtynnad ia ka khajna (income Tax) hynrei ka daw bah kaba pynlong ia ki ban ialeh pyrshah ia ka sorkar ka long ba ka khang pyrshah ia ka jing lehniam jong ki bad haka juh ka por kam shah shuh ban thang iaki briew kiba la iap. Ka jing bishar ba kyrkieh ka la rai ban phasi ia u haka por 5 P.M. jong ka juhhi ka sngi. Tang hadien 3 kynta ba la rai pynrem ia U Kiang Nangbah la phasi ha Iawmusiang, Jowai kaba dei ruh ka sngi iaw musiang ha kaba la sakhi lang da ki shipai bad ki nong shong shnong baroh.