Map bai wai ka Seinraij Jowai ar bnai ia baroh ki nongkhaïi kiba shah ktah naka jingkhangdam COVID-19

Syllad | The Rising MeghalayaJune 17, 2021

Ka Seinraij Jowai kala pynbna ba kala rai ban map iaka bai wai ia baroh ki nongkhaïi namar ka jingkhangdam ne ka Lockdown ban tem iaka jingpur ka jingpang khlam COVID-19 kaba la wan lynsher haka sien kaba ar kaba la ktah iaka kamai kajih u paidbah ha baroh ki jait kam.

“Ngi la rai ban map iaka bai wai naka bynta u bnai Jymmang (May) bad Jylliew (June) jong une snem ia baroh ki nongkhaïi ne nongdie dukan ha ki iew Seinraij bad kiba die madan namar ka jingshah ktah haka jingkhangdam COVID-19,” la ong u ma OR Shallam, President jong ka Seinraij Jowai haba kren sha ki nongthoh khubor ka district haka sngi Palei.

Ha kane ka jingiakren bad ki nongthoh khubor la iadonlang ki dkhot jong ka Seinraij Jowai ba kynthup ia u ma Lammat O Laloo bad u ma H Passah.

U Ma Shallam ula ong ruh ba ia ki nongdie madan kiba hap ban siew da ka dan T.10 shisngi yn map iaki da ka bai khyndew kaba ki hap pynthymmai manla u snem. Katba ia ki nongshim wai iaki jaka pynieng kali, ki paikhana paidbah yn pynjlan iaka por shim wai ne ka lease kaba 2 bnai.

Shuh shuh iaka bai skul naduh kyrdan primary haduh higher secondary ruh, ka Seinraij Jowai kala map na ka bynta 2 bnai kynthup iaka jaka ri khynnah crèche bad ka play school..

Ha kaba iadei bad ki iew naduh ka 15 tarik une u bnai la plie katkum ka jingpyniaid ka bor shynshar district bad ki nongdie ne nongkhaii baroh kiba shong wai haka jaka jong ka Seinraij ki hap ban pynthikna ba kila dep ai tika COVID-19 ban ioh shongdie ha ki jaka jong ka Seinraij Jowai.