Mar shiteng kiba ai tika COVID kim pat dep iaka 2nd dose ha East Jaintia Hills

Syllad | The Rising MeghalayaOctober 28, 2021

U Deputy Commissioner, Cum Chairman District Health Society, East Jaintia Hills District Bah E Kharmalki hadien bala lap ba bun ki nongshong shnong kim shym la pyndep satia ban ai iaka tika kaba ar ne ka 2nd Dose ban iada na ka jingpang khlam COVID-19, ula wer ia baroh ban wan shakhmat ban ai iaka tika ha ki jaka sumar kiba jan bad kumjuh ban pynrung kyrteng haka COWIN ban buh iaka sngi ban ai tika.

Ka jingai tika COVID-19 vaccine ka diang iaid shakhmat mynta hapoh East Jaintia Hills District. Na ka 19423 ngut ki nongioh tika ki ba don ha ka rta 45 snem sha jrong, 15203 ngut ki lah dep ban ioh ia ka 1st dose bad 10362 ngut ki lah dep ioh ia ka 2nd dose.

Kumjuh, na ka 64600 ngut ki nongioh tika ki ba don ha ka rta 18 haduh 44 snem, 40900 ngut ki lah dep ioh ia ka 1st dose bad 14462 ngut  ki lah ioh ia ka 2nd dose. Ka thong ba la buh ban ai tika kalong 93590 ngut kiba kynthup Ia ki Health Care Workers, Frontline Workers bad ki paidbah kiba ha ka rta ba 18 snem shaneng, 63892 ngut ki lah dep ioh ia ka 1st dose bad 30939 ngut ki lah ioh ia ka 2nd dose hapoh ka district.

Tangba, ki dang bun na  ki nongioh tika kiba khlem pat shim ia ka 2nd dose wat la ka lah dei ka por ia ki ban ioh ia ka 2nd Dose jong ka COVID-19 vaccine ha East Jaintia Hills District. Ki don 5794 ngut ki nongioh tika ba lah dei ka por ban ioh tika 2nd dose bad 4031 ngut kiba lah tam ia ka por ba dei ban ioh tika 2nd dose ruh.

Kat kum ka jingbthah jong ka tnad ka koit ka khiah, khnang ban ioh ia ka jingiada ba pura na u khniang jingpang COVID-19 dei ban ioh ia ka tika baroh ar dose, 1st bad 2nd dose. Ki nongioh tika kiba lah dei por ban ioh ia ka 2nd Dose ki lah ban book kyrteng online lyngba ka Co-WIN App lane ki lah ban wan beit sha ki jaka ai tika (CHCs/PHCs/ Sub Centres) kiba hajan tam. Ki lah ruh ban call ha u Meghalaya COVID helpline number ‘14410’ ban tip kham bniah shuh shuh shaphang ka jingai tika COVID-19 vaccination bad shaphang ka Co-WIN app.

La kyrpad ia baroh ki nongioh tika ban rah ia ki ID (EPIC, PAN Card, Aadhar Card, Driving License, Passport, Pension Passbook, Ration Card) ban registar ialade ha ka Co-WIN portal bad ban ioh ruh ia ka appointment slip. La kyrpad ruh ia ki nongioh tika ban bud pyrkhing ia ki kyndon COVID-19, ban deng ki mask, sait ki kti bad ban ia jngai iwei na iwei pat kumba 2 mitar ei ei.