Maramot hi NMCC iaka skul Nartiang Pohshnong Govt LP

Syllad | The Rising MeghalayaNovember 5, 2021

Ka Nartiang Modop Coordination Committee (NMCC) haka sngi Thohdieng kala shim iaka sienjam ban maramot hi iaka skul Nartiang Pohshnong Govt LP School, Nartiang kaba la jot rathai.

Ka NMCC kala rai ban shna hi ia kane ka skul hadien ba ka sorkar kala leh bymsuidniew ban maramot wat hadien ba kala ud kala nam bad ai da ka jingthoh ban maramot ia kane ka skul kaba kynthup ban pynbiang ki ben ki miej khynnah skul bad kiwei ki jingdonkam ha skul.

Kane ka committee kala dep maramot iaka kynroh ka skul kaba la jot la pra la slem bha bad ka committee kan dang bteng ban pynbha bad pynmiat ia kane ka skul bad bujli iaki tin sop ïing kiba la jot rathai nalor ban shna iaki ben, miej, blackboard bad kiwei.

U secretary ka committee HW Surong ula pynpaw iaka jingsngewnguh ia baroh ki nongkitkam bad ki dkhot jong ka committee kiba la shim khia ban pyllait por ban shna ia kane ka skul bad khamtam eh iaka jingkloi ka jong ki ban ia noh synniang ban pynbha iaka school.

Ka committee ka pynrem iaka sorkar khamtam ka tnad pule puthi halor ka jinglehklet ia kane ka skul la bun bun snem.