Maramot iaka surok bah NH-6 ne mad iaka jingiakhih; ong ka ka JAC ki 11 shnong iaka sorkar

Syllad | The Rising MeghalayaJune 16, 2024

Ka Joint Action Committee (JAC) kaba kynthup ia ki khatwei tylli ki shnong, kata ka Ratacherra, Dona Umbluh, Dona Skul, Umkiang, Lumphyllut, Lumsoski, Pyrtakuna, Borsara, Kuliang, Shymplong bad Tongseng kala dawa na ka sorkar ban maramot mardor iaka surok bah National Highway-6 naduh Malidor haduh Tongseng.

Ka JAC haka jingialang kaba long ha Umkiang haka 15 tarik Jylliew, kala shim iaka rai ba lada ka sorkar kam maramot iaka surok kin khot pynlong biang da ka jingiakhih ba khlem buh por da kaba khang ia ka surok bah National Highway – 6, ha East Jaintia Hills ka ban sdang naduh ka 19 tarik mynta u bnai ban pynpaw pyrshah halor ka jingbym shimkhia jong ka sorkar ban maramot ia kane ka surok kaba la sniew bad jot rathai.

Ha katei ka jingshim rai jong ka JAC ha ka jingialang kaba la long ha ka shnong Umkiang, na ka liang u Chairman jong ka u Bah Lasting Pala u la ong, “Ka jinglong jingman jong ka surok bah NH-6 na Tongseng sha Malidor ka la sniew sha ba palat pud bad kam iahap shuh ban ong ka surok highway namar ka la kylla kum ka pung um.”

U la ong ruh ba naduh palat shitaiew mynta, ki kali ki la sahkut lut namar ka jingsniew palat ka surok. Ha kane ka sngi yn shah tang iaki kalit kit nongpang bad ki bor pahara ban iaid lyngba ka surok.

Ha ka juh ka por u la kyntu ruh ia ki paidbah nongshong shnong ka thain kiba hap ban iaid lyngba ka surok NH-6 bad ia ki nongshong shnong kiba don ha lynter jong ka Narpuh Elaka ba kin wan iasnohkti lang ha kane ka jingiakhih pyrshah ia kane ka jingleh bym suidniew jong ka sorkar Jylla bad ka NHAI ban maramot ia kane ka surok.

“Ka jinglong jingman jong kane ka surok ka la sniew sha kaba palat pud, ngi la mad ia shibun ki jingeh, bad ngi la mad ia ka jingdheng kali kaba neh haduh saw sngi kynthih,” ong uwei u nongniah trok uba la bynrap ruh da kaba ong, “Ki trai shnong ki la kham mad shuh shuh ia ka jingeh ban ia ngi kiba niah kali khamtam ki nongpang kiba sahkut hapoh surok da ki bun bun kynta bad ia kiba ym lah ban pynpoi ia ki sha ki hospital ha ka por kaba biang haba ki donkam kyrkieh ia ki lad jingsumar. Ka sorkar ka dei ban maramot noh mardor ia kane ka surok, la kumno kumno na ka bynta shitaiew bad ba ki kali ki dei ban sangeh ban iaid lyngba na ka bynta shipor.”

Kane ka surok bah NH-6 ka dei ka surok kaba kongsan ha ka thain shatei lammihngi kaba pyniasoh ia kiba bun ki bynta jong ka thain, kata kum bad ka Assam (Barak Valley), Mizoram, Tripura bad ki bynta jong ka Manipur.

Lah ban kdew ba ka JAC ha ka 16 tarik u Rymphang ba la dep ka la leit ban ai da ka memorandum sha u Symbud Myntri Rangbah ka Jylla ha kaba iadei bad kane ka jingsniew jong kane ka sruok. Hynrei, wat hadien ka jingiai kyrpad bad ki jingmaham hynrei na ka liang ka sorkar kam shym la leh ei ei. Kumta na ka liang ka JAC kam don da kiwei pat ki lad ki lynti hynrei ban pynlong da ka jingiakhih kaba khlem buh por ban dawa ia ka sorkar ba ka dei ban maramot mardor ia kane ka surok.