Maramot ka NHAI iaki thliew ki syar: Weng ka JAC iaka jingiakhih pakhang surok NH-6 ba khlem buh por

Syllad | The Rising MeghalayaJune 23, 2024

Hadien ba NHAI kala pyndap maw iaki thliew ki syar kiba heh naduh Tongseng haduh Malidor, ka Joint Action Committee (JAC) kaba kdup iaki 11 tylli ki Shnong bapher ba don ha shilynter ka surok bah NH-6 kala weng iaka noh iaka jingiakhih pakhang surok ba khlem buh por haka miet 22 tarik Jylliew.

Ia kane rai weng jingiakhih la pynbna da u Chairman ka JAC bad Waheh shnong Umkiang Bah Lasting Pala.

Kane ka jingiakhih pakhang surok ba khlem buh por kala sdang haka 19 tarik Jylliew ban pynbor iaka sorkar bad NHAI ban maramot iaka surok bah NH6 kaba la julor bad jot rathai khamtam naduh Tongseng haduh Malidor, East Jaintia Hills.

U Bah Lasting Pala haba pynbna ula ong ba ka JAC kala weng iaka jingiakhih namar ba ka sorkar bad ka NHAI kila pyndep iaka jingdawa jong ka JAC kata ban pyndap maw iaki thliew ki syar naduh Tongseng haduh Malidor.

Ka JAC kala maham tyngeh iaka sorkar bad NHAI da kaba ong “Nangne shakhmat ngim kwah ban iohi shuh iaki thliew ki syar ha kane ka surok bah bad lada dang iohi ngin pynlong biang ka jingiakhih kaba khlem buh por.”

U Chairman ula ai khublei ia baroh ki paidbah nongshong shnong ka Dong Namchiang kumjuh ki synjuk nongialam shnong, ki sengbhalang kiba ai ka jingkyrshan iaka JAC ha kane ka jingiakhih.