MDC Election: Hukum thep vote biang haki saw jaka ha East Jaintia Hills, poi haduh 60 % ha KHADC, 70% ha JHADC

Syllad | The Rising MeghalayaFebruary 21, 2025

Ka tnad District Council Affairs (DCA) haka 21 tarik Rymphang ka la pynmih iaka hukum ban pynlong iaka jingthep vote biang ha ki saw tylli ki jaka thep vote kiba hap hapoh ki ar tylli ki constituency ha East Jaiñtia Hills district hadien ba ki paidbhur ki bym lah ban ithuh ki la rung jubor bad pynjulor ïa ki mashin thep vote electronic (EVMs).

Ka jingthep vote kan long ha ka sngi Saitjain 22 tarik Rymphang naduh ka por 7 baje mynstep haduh ka por 4 baje janmiet hapdeng ka jingpahara kaba jur.

Ha kaba iadei bad ka jingwan ki nongthep vote ha Khasi Hills Autonomous District Council (KHADC) kala kynjoh sha ka 60 percent bad ha Jaintia Hills Autonomous District Council (JHADC) ka long 70 percent haduh ka por 3 baje nohphai sngi.

Haba pynbna ïa kane ka rai, u Commissioner & Secretary DCA u Bah Cyril Diengdoh u la ong, “Ka DCA ka la hukum ban thep vote biang ha ki saw tylli ki jaka thep vote ha ki ar tylli ki konstitwensi jong ka JHADC ha East Jaiñtia Hills district. Ka jingthep vote kan long lashai ka sngi naduh ka por 7baje mynstep haduh ka por 4baje janmiet.”

Ki jaka thep vote, ki ban leit thep vote biang ki kynthup ia ka Wapung Skur A bad Wapung Skur B kiba hap hapoh ka Musniang-Rangad constituency bad ka Bataw A bad Bataw B kiba hap hapoh ka Bataw-Lakadong constituency. Baroh saw tylli ki jaka thep vote la ithuh kum ki jaka thep vote kiba lah ban shah ktah.

U bah Diengdoh u la ong ba ia kane ka rai la shim hadien ba la ioh khubor ba ka paidbhur bym lah ban ithuh ka la rung jubor sha ki saw tylli ki jaka thep vote bad pynjulor ruh ia ki mashin EVM.

Katkum ka jingong jong u, ka daw kaba thikna ha lyndet ka jingwan thombor ia ki jaka thep vote ka dang donkam ban tohkit bniah.

“Kumba ka long mynta namar ka jingjulor ki mashin EVM, ki kyndon ki ailad ïa ngi ban pynlong iaka jingthep vote biang katkum ka rule143 B. Lada don ka jingïakynad bad jingjulor ki mashin EVM, ngi la hukum ban thep vote biang na ka bynta pynlong iaka elekshon kaba laitluid bad kaba hok bad ka jingthep vote kan jia lashai ka sngi,” u la pynpaw.

Haba kylli, u bah Diengdoh u la ong, “Ki bor pahara ki la don ha kane ka jaka, hynrei kine runar kila wan da ka kynhun bad ha ka jingshisha ia ki kynhun ki nongpyniaid elekshon la pynkit noh mar mar sha ki jaka sumar ba jan tam namar ba ki ruh ki la tieng etc. Hynrei na ka liang ka bor synshar district ka dang shimkhia bha bad kam don kano kano ka jingjia mynsaw mynsnam. Baroh ki briew lait noh tang ba ki EVM ki la shah pynjulor.”

Shuh shuh, u Bah Cyril u la pyntip ba u deputy commissioner bad u SP ka district ki la bishar bniah ïa ka jingpynkhreh ban pynlong ïa ka jingthep vote biang ha ki saw tylli ki jaka thep vote.

“La shim ia ki sienjam da ka bor synshar district, u DC bad u SP. La pynbun shuh shuh ia ki pulit bad ki ADM. U DC un shim ïa ki sienjam baroh ban pynthikna ba la pynbiang ïa ki bor pahara kiba biang bad la phah ïa ki nongpyniaid elekshon kiba thymmai sha kine ki jaka thep vote khnang ban ioh biang iaka jingshaniah jong ki briew bad ka jingkyrpad na ka tnad ka long ba ki briew ki dei ban tip ba ka jingthep vote biang bad baroh ki dei ban mih iashimbynta ban thep vote,” u la ong.

Lada la ujor FIR, u bah Diengdoh u la ong ba ka DC kan sa leh ia kaba donkam.

Ha kajuh ka por, u commissioner & secretary u la pyntip ba ka jingthep vote ha KHADC ka long 60 percent bad ha JHADC ka long 70 percent haduh ka por 3 baje janmiet.

“Kane ka long jingkhein kyllum na ka bynta baroh ki constituency. Ngi dang lum ia ka jingkhein baroh kawei bad yn pyntip hadien”, u la ong.