MDC Election: Yn nym ai voter slip ban lait na ka jingleh thok, kiei ki kot ban pynithuh pule hangne?

Syllad | The Rising MeghalayaFebruary 18, 2025

Ka Ophis u District Election Officer, East Jaintia Hills District u la pynbna paidbah ba ka sorkar lyngba ka shithi No. DCA.4/2025/6, Dt. 31.01.2025, ba la pynmih da ka District Council Affairs Department, ka la bthah na ka bynta ban lait na jingleh thok ha ka sngi thep vote bad ban pynsuk ha ka por thep vote ka pynbna paidbah sha baroh ki nongthep vote halor katto katne ki jingpyntip ba donkam ha kaba iadei bad ka sngi thep vote ha ka 21.02.2025.

Ka Ophis ka pyntip ba yn ym ai shuh ia ki Voter Slip ne ki Slip thep Vote sha ki Booth Level Officer/Nongthep Vote. Hynrei ki Nongthep Vote ki lah ban pynithuh ialade da kine ki jingpynithuh harum:

Epic
Passport
Driving Licence
Income Tax Identity (PAN) Card
Passbook ba la ai da ki Public Sector Bank/ Post office and Kisan Passbook kiba suh lang bad ki dur.
SC/ST/OBC Certificate ba la ai da ki bor sorkar.
Ki kot ki sla Pension ki Ex-Servicemen’s Pension Book/ PPO/ Ex-Servicemen’s Widow/ Dependent Certificates, Old Age Pension Order, Widow Pension Order ryngkat ki dur.
Laisen tiar siat ba la ai da ki bor ba dei peit.
Syrnot na ka bynta kiba don jingduna ha ki dkhot met ba la ai da ki tnad ba dei khmih.
Ki Job Cards ba la ai hapoh jong ka MNREGA ryngkat ki dur.
Health Insurance Scheme Smart Card bad ki dur.
Ki School Certificate ba la ai da ki bor pyniaid skul ba la ithuh da ka sorkar ne da ki bor sorkar ka thain ha ryngkat ki dur.
Syrnot jaka shong jaka sah ba pura ba la ai da ki bor District.
Ki bill bai bording ne Electricity Bill
Aadhaar Card
Ki Service Identity Card ba la ai sha ki nongtrei na ki tnad ka Sorkar Pdeng / Sorkar Jylla ryngkat ki dur.

Nalor kata la pynshlur bad la kyntu ia baroh ki nongthep vote ban iamih paidbah ha ka ban ia leit shim bynta ha ka jingiathep vote ha ka 21tarik Rymphang 2025 kum ka dak ban pyndep ia la ka jong ka hok bad ka kamram.