Meghalaya Election: Ki kyrtong kiba la thep kyrteng na East Jaintia Hills bad West Jaintia Hills

Syllad | The Rising MeghalayaFebruary 6, 2023

Shi sngi shuwa ban kut ka jingthep kyrteng na ka bynta ban aireng sha ka election sha ka iing dorbar thawain jong ka jylla kaba ka jingthep vote kan long haka 27 tarik Rymphang ki don haduh 15 ngut kiba thep kyrteng haka sngi Nyngkong.

Kine ki kyrtong kiba la wan ban thep kyrteng ki kynthup ia u Moonlight Pariat candidate ka United Democratic Party (UDP), Daniel Dann Candidate ka Congress, u Andrew Shullai Candidate ka All India Trinamool Congress.

U MLA ka Jowai u Wailadmiki Shylla un thep kyrteng lashai ka sngi  ba Ar.

Haduh saw ngut ki kyrtong na ka 1 Nartiang Constituency. Kine ki kyrtong kiba la thep kyrteng ki dei u Emlang Laoo na ka Congress, u Dawan Lyngdoh na ka United Democratic Party (UDP), Rimiki Sari na ka Bharatiya Janata Party (BJP), Generous Pasleiñ kum u kyrtong Independent.

Kane ka constituency ka dei kaba mihkhmat da u Ma Sniawbhalang Dhar, MLA bad myntri sorkar uba la long MLA la lai samoi. U ma Sniawbhalang ula dep thep kyrteng naduh ka 4 tarik u Rymphang.

Ka 3 Raliang Constituency mynta ka kynti kan sakhi iaka election MLA kaba bun ngut ki kyrtong. Kane ka constituency ka don haduh 6 ngut ki kyrtong kynthup ia u MLA barim ka Mowkaiaw u ma Robinus Syngkon uba ban aireng na ka Trinamool Congress.

U MDC bad chairman barim ka JHADC u ma Lakhon Biam na ka Bharatiya Janata Party (BJP), u MDC ba mynta ka Shangpung u J Treilang Suchiang na ka United Democratic Party (UDP).

Nalor kine lai ngut u Ma Richard Singh Lyngdoh na ka Congress, Shemhok Garod na ka PDF bad u ma Comingone Ymbon MLA ba mynta na ka National Peoples’ Party (NPP) kila dep thep kyrteng haka sngi Saitjain ka taiew bala dep.

Na ka 4 Mowkaiaw Constituency ki don ar ngut ki kyrtong kiba thep kyrteng bad kine ki kyrtong kiba thep kyrteng ki kynthup ia MDC Saphai u Habahun Dkhar u ban aireng na National People’s Party (NPP), u Nehemayah Tyngkan u ban aireng na ka Congress.

Uwei pat u kyrtong u dei na ka Trinamool Congress u ma Lasting Suchiang. u MLA ba mynta na kane ka constituency u dei da u ma Nujorki Sungoh na ka United Democratic Party (UDP) ula dep thep kyrteng haka 4 tarik une u bnai Rymphang.

Na Amlarem u MLA ka thaiñ u Ma Lahkmen Rymbui kyrtong ka United Democratic Party (UDP). U MLA barim u ma Stephanson Mukhim uba ban aireng na ka National People’s Party (NPP) bad uwei pat u dei u kyrtong u Alban K. Gashnga kyrtong ka Trinamool Congress

Na East Jaintia Hills: Ki kyrtong kiba la thep kyrteng ki kynthup ia u president ka MPCC u ma Vincent Pala kyrtong Congress, u Krison Langstang na ka BJP ki ban aireng na Sutnga Saipung. U Ma Shitlang Pale MLA bad kyrtong ka UDP bad ka Santa Mary Shylla kyrtong NPP kila dep thep haka sngi Saitjain ka taiew bala dep.

Na Khliehriat Constituency u Bhayes Chyrmang ula thep kyrteng na ka BJP, Jhanika Siangshai na Congress.

Kawei pat ka kyrtong kaba thep kyrteng ka dei ka kong Violet Lyngdoh na ka NPP.